NASUROY ko sa sitio Kantipla 1 sakop sa Barangay Tabunan dakbayan sa Sugbo niadtong Biyernes. Kini nga dapit nahimutang sa usa ka bahadaun ug subidahon nga bahin sa Trans Central Highway. Nakapahibulong nako kay ang maong sitio nagdala og duha ka barangay. Pananglit ang mga mag-uuma didto nga mao gyud ang akong tuyo, mopailaila nga taga sitio Kantipla 1 sakop sa Barangay Tabunan. Ang uban nagpaila nga taga sitio Kantipla 1 pero sakop sa Barangay Taptap.
Sa usa ka bahin may nituybo nga usa ka kan-anan nga matawag nato nga presintable kaayo kay nagdung-aw man sa bungtod. Padung nako sa maong kan-anan sa dihang may nidulhug nga sakyanan nga gitawag nila og Bonggo, nga nakadapit sa akong pagtagad. Kini tungod sa nangumbitay nga baligyaon nga gipahiluna sa luwang sa sakyanan. Mga baldi, planggana, arenola, ka-ang, hanger, mga sinina ug daghan pang tinda ang karga. Nihunong ang sakyanan kay may nipara nga mga kustomer. Dinhi akong nailaila ang tag-iya nga mao sab ang nagmaneho sa sakyanan. Ang tag-iya ug driver mao si Danilo Mahait, 58, biyudo, taga Barangay Tutay, Pinamungajan, Cebu. Matod niya, nakahukom siya nga moruta sa Trans Central Highway kay dugay na siya nga wala makabalik. Gikan pa siya sa Pinamungajan. Ang paagi sa iyang paninda taudtaud na niya nga gihimo bisan niadtong panahon sa wala pa ang pandemiya. Mao na ning paagiha ang iyang naandan diin nakabaton siya og daghang suki sa mga sitio ug barangay nga iyang maagian.
Tuig 1990, nanimpalad siya sa Manila ug didto niya gipaila ila kining paagi sa paninda. Nangabang siya og trisikad ug iyang gikargahan sa iyang kinumpra nga mga planggana, balde ug ubang gamit tungod kay naggamit siya og trisikad, gilupig niya kadtong nanuroy pinaagi sa pagbaktas. Mao nga nikita ang maong paagi ug human makatigum nipauli siya sa Pinamungajan. Nipalit siya og multicab ug iyang gipadayon ang pagpanuroy sa iyang mga tinda ngadto sa kasilinganang dapit. Gikan sa multicab nagka dako ang iyang sakyanan ug nagkataas ang iyang rota. Dihay higayon nga nagruta siya og Negros diin naabtan siya sa Bagyong Sendong. Katapusan niya nga ruta kadtong padung na nga mag hinungdan nga may mga tinda siya nga natanggong sa Kanlaon City. “Ang nakanindot ani nga paagi sa paninda kay daghan ko og maadtoan. Unya dako kaayong bentaha alang sa pumalitay kay dili na kinahanglan nga moadto pa sila sa lungsod o siyudad,” pasabot ni Danilo. Tinuod gyud kay didto lang sa Kantipla 1 daghan ang nahinangop sa pagrota ni Danilo. Ning panahon sa pandemiya dakong bentaha nga inay ikaw ang moadto sa tindahan, ang tindahan na ang moduol nimo. Magdepende hinuon kini sa rolling store sanglit ang uban taas kaayo ang presyo. Matod ni Danilo, ginagmay ra ang iyang patong aron daling mahurot ug mogaan ang kargada sa iyang sakyanan. Mao nga kutob sa mahimo magsige gyud siya og rota bisan asa pa siya ipadpad ning panahon sa pandemiya.