MOABOT og 28 ka mga quarantine violator nasikop sa Mandaue City Police Office (MCPO) atol sa synchronized law enforcement operations niadtong hinapos sa miaging semana.
Si Police Major Zosimo Jabas, pangu sa operations and management unit sa MCPO, niingon nga ang operasyon hiniusa sa tanang police stations sa dakbayan sa Mandaue nga nagsugod niadtong Pebrero 26.
Kini human gitahasan sa Emergency Operations Center (EOC) alang sa Covid-19 ang MCPO nga hugtan ang pagpatuman sa quarantine protocol, labi na nga nagkapaspas ang pagsaka sa kaso sa Covid-19 sa dakbayan.
Matag Biyernes ngadto sa Dominggo na kini buhaton sa tanang estasyon, diin 24 oras ang operasyon.
Matod ni Jabas, dungan nga magpahigayon og patrol operations ug rekorida ang tanang estasyon aron mas mapatuman ang quarantine protocol.
Gipasiugdahan sa MCPO ang operasyon aron ilang maseguro nga padayon ang pagpatuman sa giimplementar nga mga protocol sa gobyerno.
Gituyo nilang Jabas nga ipahigayon sa weekednd tungod ilang nakita nga mas daghan ang manggawas sa ilang panimalay niana labi na nga way trabaho ug klase.
Apan, gipasabot ni Jabas nga bisan anaa silay synchronized law enforcement operation sa weekend, padayon gihapon ang matag estasyon paghimo sa kaugalingong operasyon.
Gikan sa Pebrero 26-27, nakasikop sila og 10 ka mga violator samtang sa Pebrero 27-28, nakasikop sila og 18 ka mga violator. (KFD)