ANG tanan na gyud ka 80 ka mga barangay sa Cebu City naigo na karon sa coronavirus disease 2019 (Covid-19) human ang Barangay Tabunan nitala sa labing unang kaso sa Covid-19.
Ang Cebu City gilangkuban sa 80 ka mga barangay.
Sa data sa Emergency Operations Center (EOC) sa Pebrero 27, 2021, ang Barangay Tabunan, bugtong barangay nga nagpabilin nga way coronavirus disease sukad sa pandemic sa miaging tuig, di na libre sa sakit.
Niadtong miaging tuig sa dihang nisulbong ang mga kaso sa Covid-19, ang Barangays Tabunan, Paril, Tagba-o ug Buot wa masudlo sa sakit.
Apan, niadtong Enero 2021, ang Buot nitala sa unang kaso, samtang ang Tagba-o sa unang kaso sa ikaduhang semana sa Pebrero. Sa miaging semana, ang Paril naigo usab.
Ang data sa EOC nagpakita nga ang 66 ka barangays sa siyudad dunay aktibong Covid-19 transmission, samtang 14 ka mga barangay wa motaho og pagpanakod sa nakalabay nga 10 ka mga adlaw.
Si Cebu City Councilor Joel Garganera, EOC deputy chief implementer, niingon nga bisan tuod kon wa nay barangay sa siyudad nga wa maigo sa Covid, apan ang mga barangay nga dunay mga kaso nga gitaho sa nakalabay nga 10 ka mga adlaw nagsaka.
“But on the other hand, 14 na ka barangays ang wala’y reported transmission for the last 10 days. A week ago, seven nalang but now ni-double na at 14,” matod ni Garganera sa Dominggo, Pebrero 28.
Ang Barangay Guadalupe, labing dako nga barangay sa Cebu City ug dunay labing dako nga populasyon nga 80,000, nagpabilin nga dunay labing daghang aktibong mga kaso sa Covid-19 sa nakalabay nga 10 ka mga adlaw.
Gikan sa Pebrero 18-27, ang Guadalupe nitala og 232 ka mga kaso sa Covid-19.
Si Guadalupe Barangay Captain Michael Gacasan niingon nga aron di makakatap ang kagaw, magpadayon ang stay-at-home matag Dominggo.
Si Gacasan niingon nga ang sagad sa mga kaso sa barangay mga medical frontliner, trabahante sa bangko ug ilang mga pamilya.
Siya niingon nga sagad sa mga tawo nga dunay Covid-19 nagpuyo sa mga condominium ug villages.
Laing barangay nga dunay taas nga kaso sa Covid-19 mao ang Barangay Tisa nga dunay 106 gikan sa Pebrero 18-27.
Ang Tisa usa sa dakong barangay sa siyudad.
Laing mga barangay nga dunay taas nga mga kaso sa Covid-19 sa milabay nga 10 ka mga adlaw naglakip sa Barangay Labangon (100); Apas (89); Lahug (88); Talamban (87); Mabolo (74); Camputhaw (73); Punta Princesa (64); ug Sambag 2 (49). (JJL)