TAXI driver namatay human nabangga ang iyang motorsiklo sa duha ka mga motorsiklo nga gikasugat alas 10:30 sa gabii sa Sabado sa bag-ong dalan sa Barangay Yati, lungsod sa Liloan, Sugbo.
Si Jose Benjie Cardi, 45, ulitawo, taxi driver, nagpuyo sa nahisgutang barangay, patay nang niabot sa tambalanan sa lungsod sa Consolacion.
Samtang naangol ang mga gikabangga niya nga giilang sila si Dan Jay Nietes, 25, ulitawo, taga Brgy. Cabangcalan, Dakbayan sa Mandaue ug Elmer Flores, 26, ulitawo, accounting staff sa Norkis, taga Brgy. Ocaña, dakbayan sa Carcar.
Si Police Corporal Ian Lagnasan, traffic investigator sa Liloan Police Station nga nahinabi sa Superbalita Cebu, nagkanayon nga si Cardi padulong sa dakbayan sa Sugbo sakay sa iyang Suzuki Sniper nga motorsiklo.
Kusog ang iyang dagan dihang siya kalit nga mi-left turn hinungdan nga nabangga sa Yamaha Aero nga motorsiklo nga gimaniho ni Nietes, kinsa padulong sa norte sa Sugbo.
Samtang ang nagsunod ni Nietes, ang laing motorsiklo nga gimaniho ni Flores, nga nabangga sab kang Cardi.
“Kalit man siyag liko sa wala, unya sakto sab ang dagan sa gikasugat, head on collision. Ang ikatulong motorsiklo nadamay, naigo sab,” dugang ni Lagnasan.
Matod ni Lagnasan nga tungod sa kakusog sa dagan ingon man sa impact sa pagkabangga, maayong pagkaguba sa mga motorsiklo. (GPL)