SUPERBALITA CEBU

Mga batang Lumad gigamit sa CPP-NPA?

■ FRONT SA KOMUNISTA? Sila si Eric Almendras (wala) ug Noel Legaspi (tuo) gipresentar sa Police Regional Office (PRO) 7 sa usa ka press confe­rence sa Sabado sa hapon, Pebrero 27 aron pagpalig-on sa alegasyon sa kapulisan nga ang batang Manobo gigamit sa mga rebeldeng komunista. / Benjie B. Talisic

GIINGONG kanhi mga sakop sa rebeldeng New People’s Army (NPA) sa Communist Party of the Philippines (CPP) nipasangil nga gigamit sa walhong pundok ang mga batang Lumad nga gi-rescue sa kagamhanan sa Dakbayan sa Sugbo mga duha ka semana na ang nakalabay.

Nipasangil usab sila nga ang mga bata gihinayhinayan sa pagtudlo aron sa kaulahian magpasakop sa NPA.

Sila si Eric Almendras, alyas Ka Eric, ug Noel Legaspi, gipresentar sa Police Regional Office (PRO) 7 sa usa ka press conference sa Sabado sa hapon, Pebrero 28, 2021 aron pagmatuod sa alegasyon sa kapulisan nga ang nagkupot sa kabataan mao ang mga legal front sa CPP.

Matod sa duha nga nianhi sila sa Sugbo gikan sa Mindanao aron pagbutyag sa tinuod nga katuyoan sa Lumad Bakwit School.

Matod ni Almendras nga target sa komunistang grupo ang Sugbo alang sa pag umol sa Bakwit Lumad School aron makatigom og pundo lakip na niini ang pag- kuha sa simpatiya sa publiko.

Usa sa mga paagi niini ang pagpakita sa kahimtang sa mga Ata Manobo gikan sa lungsod sa Talaingod, Davao del Norte ug ubang mga tribu sa Mindanao.

Nipasangil si Almendras mao ang pag recruit gikan sa grupo sa mga Lumad nga mahimong kaabin sa komunistang hut-ong.

Iyang gitumbok si Chad Booc, kinsa apil sa nadakpan sa giingong rescue operation, nga sakop sa CPP.

Gihulagway ni Almendras si Booc nga di ordinaryong aktibista o boluntaryong magtutudlo sa Save our School Network (SOSN) sanglit usa kini ka operatiba sa communist party.

“Kilala namin ito. Itoy kumikilos sa UP Diliman sa College of Engineering dati at ito ay CPP member sa UP Diliman. Nag-deploy ito papuntang Mindanao upang pumasok dito bilang volunteer teacher kunware. Pero ang purpose nya ay lumangoy upang magkaroon na mga infusing of cadre or leaders galing sa kabataan sa Maynila na magkaroon ng mga intellectuals upang mamumuno sa program na ito,” matod ni Almendras.

Si Booc una nang nanghimakak nga siya sakop sa CPP bisan kon iyang giangkon nga nagkakita sila ni CPP head Joma Sison sa iyang pagduaw sa Europe.

Gihimimakak nila ang pamahayag sa usa sa mga bata nga gihinabi sa media ug sa Department of Social Welfare and Development 7(DSWD) nga wala sila gitudloan nga mobatok sa gobiyerno o mahimong radical.

Matod ni Jovany Batawan, nigradwar sa kursong education sa Mindanao Interfaith Solidarity Foundation Incorporated ug kanhi magtutudlo sa Bakwit Schools, niadtong Marso 2020 lang siya nihawa tungod kay giabandonar sila sa kadagkoan sa ilang grupo.

Iyang giangkon nga sa wa pa siya magtudlo, nahimo siya nga sakop sa NPA nga naglihok sa Compostela Valley sa Davao de Oro niadtong 2014.

Kauban sila ni Roshelle Mae Porcadilla nga lakip sa gidakop sa kapulisan nga gitumbok nga maoy maestro sa mga menor de edad.

Iyang gi butyag nga sa sulod sa klase sa Bakwit School, wa silay subject nga radicalization apan kon naa na kini sa sulod sa boarding house, diin gidili nga makasulod ang mga ginikanan, didto na itudlo sa bata nga linghod pa ang pangisip nga masuko sa gobiyerno.

“Ang mahitabo kon way klase, naga conduct kamig mga pagtuon diha nga gitawag namog padepa o pambansang demokratikong paaralan. Naga conduct pud mig BPC kun basic party course nga kana tanang pagtulon-an iya na sa pagtulon-an sa partido kumunista sa Pilipinas. Mao nang mga estudyante sa Bakwit School mga lantip nanag panghuna-huna”, matod ni Batawan.

WA MASAYOD

Nagtuo hinuon sila nga walay kasayuran ang management sa University of San Carlos kon unsa kining bakwit lakip na si Cebu Archbishop Jose Palma nga misuporta sa SOSN.

“Sa akong pagsabot, ang San Carlos University as an institution sa administration niya, wala na kahibalo sa unsa ang hidden nga programa sa partido. Admittedly na deceived sila. So, ingon ana ang nahitabo,” matod ni Legaspi.

Gani iyang gipahibawo nga aduna pay mga magtutudlo sa Bakwit School nga atol sa gihimong rescue operation nakaikyas. Nailhan, matod pa, kini ni Legaspi nga lumad nga taga Sultan Kudarat ug ang mga ginikanan niini kauban niya kaniadto sa dihang nag lihok pa siya sa komunista sa bukid. (AYB, BBT)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph