SUPERBALITA DAVAO

Roldan: Nahadlok sa bakuna?

Nota Bene

HUMAN sa dugay-dugay nga paghulat, niabot ra gyud ang pinakaunang bakuna sa Covid-19 gikan sa China.

Niadtong Dominggo, gitagbo ni Presidente Rody Duterte didto sa Ninoy Aquino International Airport ang eroplano sa People's Republic of China nga nagdala og 700,000 ka doses sa bakuna nga Sinovac nga ginama sa Sinofarm sa China.

Gidonar lang kini sa kagamhanan sa China busa dako ang pasalamat ni PRody nga matud pa niya, nagpakita lamang nga suod nga higala ang Pilipinas sa China.

Mas nauna pa ang Sinovac nga nahiabot samtang anaa pa sa negosasyon ang gikahinaman nga bakuna gikan sa Pfizer sa Amerika ug uban pa nga gikan sa Europe ug laing nasud.

Matud pa ni vaccine czar Sec. Carlito Galvez nga moadto sab ang ilang team sa India aron mohangyo nga mapiksan ang Pilipinas sa ilang ginamang bakuna.

Atong nahibaloan nga naiwit ang atong nasud sa bakuna tungod kay 80% sa tanang bakuna sa mga higanteng pharmaceuticals sa Amerika ug Europa kay gi-order na sa mga first world countries nga makabayad dayon sa presyo nga ilang produkto.

Naghimo na'g lakang ang World Health Organization aron adunay patas nga distribusyon sa bakuna ang mga dato og pobre nga nasud sa kalibutan.

Ambot kaha kung may maaprob na nga bakuna nga ginama sa Pilipinas aron di na ta maoangkat pa sa uban ug sila na sab ang magpakiluoy sa ato aron mahatagan og suplay sa bakuna? Apan sa laing bahin, andam na ba mo nga mabakunahan?

Daghan ang akong nadunggang istorya nga dili sila magpabakuna sa kahadlok sa dautang side-effects niini.

Gani ang katapusang resulta sa surbey sa Pulse Asia nagpakita nga hapit 50% sa Pinoy dili andam nga magpabakuna. Ubay-ubay sab ang nagpaminaw lang samtang gamay ra ang buot magpabakuna tungod tingali kay wa silay choice kay trabahante sila sa gobyerno ug kinahanglan nilang magpabakuna sama sa mga health frontliners ug kapulisan.

Apan sama sa ubang bakuna, dili malikayan nga may side effects nga bation sa maturokan depende sa iyang kahimtang sa panglawas ug edad. Kadtong naay seryusong allergy posibleng dili turokan hasta ang may grabeng sakit o kadtong taas na kaayo og edad. Magkalahi sab ang epekto sa matag bakuna. Matud pa sa balita, lapas la'g gamay sa 50% ang effectivity rate sa Sinovac vaccine samtang molapas og 90% ang rate sa bakuna nga ginama sa Amerika ug Europa.

Mas isog sab ang bakuna nga ilang ginama nga maayo sa mga batan-on ug hamtong nga dili molapas og 60-anyos.

Para kanako, dako ang hagit sa atong kagamhanan aron motaas ang pagsalig sa katawhan nga magpabakuna.

Basin modagsa ang daghang suplay sa bakuna apan langawon lamang kini sa mga health centers ug hospital sa gobyerno kay walay magpabakuna.

Unta ipakita sa mga tag-as nga opisyal sa gobyerno ug mga iladong tawo pinaagi sa TV ang ilang pagpabakuna aron mosunod pod ang katawhan ug dili sila bation og pagduha-duha nga gihimo lang sila'g guinea pig sa mga big pharma aron makasapi. O kamo diha, andam na nga maturokan?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph