DAVAO DE ORO -- Patay ang usa ka lalaki human gipusil sa wala mailhing mamumuno atubangan mismo sa Compostela Municipal Gym sa Barangay Poblacion, Compostela alas 12:00 sa udto kagahapon, Marso 1, 2021.
Ang biktima giila nga mao si Lucman Saranggani, 44, negusyante ug molupyo sa JP Laurel St., Barangay Poblacion, siyudad sa Panabo.
Sa gihimong pakighinabi sa Superbalita Davao sa drayber sa gisakyan sa biktima, nasayran nga niadtong higayona, si Saranggani gikan pa sa siyudad sa Panabo ug motambong unta sa taral sa iyang kaso nga dunay kalambigitan sa druga sulod sa Hall of Justice, tapad lang sa munisipyo sa lungsod.
Apan tungod matud pa kay nauwahi ang biktima sa gitakda nga oras, nagpaabot lang una sila, kauban sa asawa niini nga si Lorlyn alang sa ikaduhang hugna sa pagdungog, uban sa laing duha pa nila ka paryente nga sila Abdul ug Abdullah.
Apan samtang naghuwat ang biktima sulod sa Adventure nilang sakyanan, dunay plaka nga LAC 1757, kalit lang nipaka ang usa ka buto sa armas kon diin niadtong higayona ang asawa ug duha pa ka paryente niini tua sa gawas sa sakyanan.
Sa pagtuo nga nibuto ang ligid sa sakyanan, gisusi kini ni Jun, apan iyang nadungog nga dunay giistorya ang biktima gamit ang pinulongan nga Islam ug dayon natumba kini nga dunay dugo ang suwang.
Apan ang asawa sa biktima nagkanayon nga wala siyay nakitang tawo nga maoy mipusil sa iyang bana.
Nasayran gikan kang Jun nga unang higayon kadto nga miadto sila sa lungsod sa Compostela uban ang biktima human nga gitawgan matud pa kini sa iyang abogado nga siputon ang pagtaral o pagdungog sa iyang kaso.
Sa pagsulat ning balita, padayon pa sa pagkalap og mga ebidensiya ang Scene of the Crime Operatives alang sa kasulbaran sa krimen. (Dexter T. Visitacion)