Namupo og daghang pasidungog ang Barili’s Best Shooting Team sa Barili Police Station atol sa bag-ohay lang gitapos nga Police Brigadier General Ronnie Montejo Shooting Competition nga gipahigayon sa Cebu Wonderland Shooters Club sa Agus, Dakbayan sa Lapu-Lapu.
Ang Team Barili nahimutang sa ikapitong dapit sa 111 ka mga team nga niapil sa kompetisyon. Ang ilang hepe nga si Police Major Romeo Caacoy Jr. maoy miangkon sa ikaduhang dapit sa Police Lieutenant to Police Major Category ug 7th runner up sa overall shooting participants.
Si Police Master Sergeant Ethel Villahermosa, ang lady shooter sa Team Barili, mipakita sa iyang kabangis sa firearms proficiency diin nakuha niya ang 1st runner up sa Police Master Sergeant to Police Executive Master Sergeant Lady Category.
Ning kalampusan sa Barili Police Station sa kompetisyon nga gitawag usab og “RDs Cup” resulta sa ilang pakig-alayon sa lungsod sa Barili ug sa way puas nga suporta nga gihatag ni Mayor Julie Flores.
Gitinguha ni Flores nga mahatagan sa importansiya ang firearms proficiency ilabi na sa pagpatuman sa balaod kansang ilang gimbuhaton nga maseguro ang kaluwasan sa katawhan.
Niini, mapasalamaton ang kapulisan sa Barili nga gipangulohan ni Caacoy kang Flores sa padayong suporta niini. (PR)