Babayeng magtutudlo sa Salugpongan Bakwit School nga lakip sa pito nga nadakpan sa gilusad nga rescue operation sa Department of Social Welfare and Development 7 ug Police Regional Office 7 naa ra sa selda sa Cebu City Police Office.
Kini sukwahi sa pasangil sa militanteng pundok nga nahanaw sa bilanggoan nga way pagtugot sa iyang abogado.
Nag-rally atubangan sa PRO 7 ang mga militanteng pundok niadtong Sabado sa gabii, Pebrero 27, 2021 aron ikondina ang gihimo sa kapulisan pagkuha ni Roshelle Mae Porcadilla sa selda sa CCPO nga way pagtugot sa iyang abogado.
Apan gipakita ni Police Colonel Josefino Ligan, hepe sa CPPO, ang detention facility ngadto sa mga sakop sa media aron pagsusi kon tinuod ba ang pasangil.
Naa ra sa sulod si Porcadilla uban sa laing mga babayeng dinakpan apan wa na motubag sa mga pangutana sa mga reporter.
“Dili na tinuod nga alegasyon. Si Ms Roshelle Porcadilla naa diri karon sa atoang temporary detention facility sa Cebu City Police headquarters. Naa siya diha nag-estar. Maayo ang iyang pagkabutang ug wala siyay gibati nga bisan unsa,” matod ni Ligan.
Dugang ni Ligan nga hugot nga siguridad ang ilang gipatuman sa kampo, wala pa silay gitugotan nga maka dalaw sa mga dinakpan tungod sa pandemic. (AYB)