Dul-an sa 100 ka mga vendor nipahigayon og rally atubangan sa Cebu City Hall ug nanawagan nga ibasura ang joint venture agreement (JVA) sa pag-develop sa Carbon Public Market.
Ang mga ambulant vendor uyon sa pagpalambo sa Carbon apan ang ilang gusto nga mo-develop ang City Government, way pribado nga investor.
“No to privitization, save Carbon Public Market. Ibasura ang kontrata,” siyagit sa mga vendor nga nagsul-ob og itom nga mga t-shirt.
Nilanat lang og 10 minutos ang ilang rally nga gihulagway mga malinawon sanglit ni-cooperate ra sila sa kapulisan pinangulohan ni Police Major Edgar Labe uban sa Task Force Kalasaligan.
Ang grupo sa mga manindahay niduso og posisyon paper para mapaabot ngadto sa mayor ang ilang hangyo nga ikanselar ang kontra tali sa Megawide Corporation.
Si Mayor Edgardo Labella subli nga nihatag og kasigurohan sa mga vendor nga way privitization nga mahitabo, way vendors nga mawagtangan sa ilang panginabuhian gumikan sa pag-develop sa Carbon.
Matod pa sa mayor nga ang usbaw sa renta matag metro kwadrado sa mga stall sa Carbon ipaagi og public hearing sa konseho nga maoy moaprub sa di pa ang Office of the Mayor. / PAC
Ang Megawide gikatakdang mosugod sa ilang construction sa third quarter niining tuiga human sa pagbalhin sa kapin sa 300 ka vendors sa Freedom Park sa Unit 2 building nga andamon sa Megawide.
Mokabat ngadto sa P5.5 bilyones ang pundo nga igahin sa Megawide sa first phase sa Carbon Public Market kansang construction molanat og lima ka mga tuig.
Ang Carbon iyaha lang gihapon sa Siyudad, apan dumalahon kini sa Megawide nga motukod sab og mga imprastraktura sa mga balay patigayon ug terminal. (PAC)