Lalake nga 23 anyos nadakpan sa entrapment sa kapulisan niadtong Dominggo sa gabii, Pebrero 28, 2021 human siya gireklamo sa usa ka 19 anyos nga dalaga nga ni-upload sa hubo nga hulagway sa social media.
Duna siyay 17 ka accounts sa social media, diin gwapong mga hulagway ang iyang gihimong profile picture aron pagdani sa mga babaye, usa na niini si Marie (di tinuod niyang ngan).
Nabilanggo sa Talisay City Police Station si Robert Delusan, taga Barangay Cabantug, lungsod sa Argao, Sugbo tungod sa reklamo ni Marie, taga Dakbayan sa Sugbo.
Sila si Delusan ug Marie nagkauyab niadtong Pebrero 14, Valentine’s Day. Nadani ang dalaga sa kagwapo ni Delusan, kinsa nagdala sa alyas nga John Mark Samson. Ang profile pic maorag kagwapo sa mga artista sa mga K-drama.
Matod ni Police Lieutenant Roberto Barnido, deputy station commander sa Talisay City Police Station, sa ilang panag-uyab ni Delusan ug Marie sa Facebook, wa pa sila magkatagbo bisan makausa.
Si Delusan niagni kang Marie nga mag video call ug mag sex silang duha.
Kay nakauyon lagi ang dalaga sa kagwapo ni Delusan sa iyang profile pic, nisugot ang dalaga bisan wa mopakita sa nawong ang lalake.
Wa masayod si Marie nga gikuhaan na siya og hulagway ni Delusan. Human niini, si Delusan nanghagad na kang Marie nga magkita sila aron mahinayon ang linawas nila nga sex.
Apan nibalibad ang dalaga hinungdan nga gihulga siya ni Delusan nga i-upload ang hubo nga hulagway sa internet.
Kay wa motuo ang dalaga, gi-upload ni Delusan ang hulagway ni Marie sa Facebook.
Dugang ni Barnido nga pagkahibawo ni Marie nga ang iyang hulagway nga way sapot na post na, iya kining gikauwaw pag maayo.
Nidangop si Marie ug ang iyang ginikanan kanila ni Police Lieutenant Colonel Gerard Ace Pelare, hepe sa Talisay City Police Station.
Ilang gihimo ang pag entrap kang Delusan nga gipangulohan sa Women and Children Protection Desk uban ang Argao Police sa lugar niini sa Barangay Cabantug sa Dominggo pasado alas 11 sa gabii, Pebrero 28.
Nisakay usab si Delusan, kinsa naghinamhinam nang makakita sa dalaga.
Wa siya masayod nga uban ni Marie ang mga pulis nga nidakop gilayon kaniya. Nakuha gikan kang Delusan ang usa ka cell phone ug motorsiklo.
Ilang nasayran nga si Delusan dunay 17 ka mga account nga lahi-lahi ang mga ngan ug profile picture.
Sulod sa cell phone duna pay laing mga hulagway sa mga babaye nga naghubo hinungdan nga sila nagtuo nga di lang si Marie ang nabiktima ni Delusan. (BBT)