BANA nga wala maka-sex sa iyang asawa ug giingong kanunay siyang komedyhan nga gamay ang iyaha, nag-wild, asawa gitigbas, apil ang ilang anak nga lalake alas 5:30 sa hapon sa Dominggo, Pebrero 28, sa Sitio Batang 1, Brgy. Bongon, lungsod sa Tabuelan.
Ang inahan naigo sa wala nga dunggan samtang ang anak dunay daghang mga samad sa ulo, nawong ug buko-buko.
Si Rene (di tinuod niyang ngan), 48, minyo, mangulingay, nadakpan sa kapulisan human niya tigbasa sila si Marina (di tinuod niyang ngan), 49, ug ilang anak nga si Arnel, 25.
Si Police Staff Sergeant Jerome Millor, imbestigador sa Tabuelan olice Station nga nahinabi sa Superbalita Cebu, nagkanayon nga hubog si Rene nga niabot sa ilang balay.
Gipangita niya iyang asawa ug dihang nakit-an, iyang gipakuha sa ilang baka nga gitugway.
Apan nabalik, nagkalalis ang magtiayon kay dugay nabalik si Marina.
Gumikan sa kasuko ni Rene, nikuha siya og jungle bolo, gitigbas ang ibabaw sa ulo ni Marina, apan ang punoan sa sambag ang naigo.
Sa ikatulong pagtigbas, iyang gikuptan ang ulo sa iyang asawa, asawa apan kalit nga mihupo si Marina hinungdan nga ang naigo ang wala nga dunggan.
Si Rea, 26, anak sa magtiayon nga nakakita, nisinggit sa pagpangayo og tabang dihang iyang nakita nga nagkadugo ang iyang inahan.
Si Rea nidagan sa sulod sa ilang balay, gipukaw si Arnel kinsa natulog.
Sa paggawas ni Arnel, iyahang nakit-an iyang Mama nga nagkadugo, pero wala na diha ang iyang amahan kay mitago.
Sa kalagot ni Arnel nga wala diha iyang amahan, nikuha kinig sundang nag-wild, gipangtigbas ang ilang mga tanom.
Wa siya makabantay nga samtang gipanghabas niyag tigbas ilang mga tanom, si Rene nangita og tempo.
Dihang nalipat si Rene, kalit nga iyang giatake ang iyang anak. Si Rene nitigbas sa tangkugo ni Arnel, sunod buko-buko dayon nawong.
Human mahagba, si Rea na usab ang gigukod ni Rene, apan nakadagan ang anak sulod sa ilang balay.
Nakapangayo og panabang ug nangabot ang mga barangay opisyal, gidakop si Rene.
“Ang iyang sigeg sulti nga iyang asawa dili na modulog niya pagkatulog. Ganahan siya nga motira, mobalibad. Lagot kaayo siya,” dugang ni Millor.
Si Rene naila sab nga magmaoy sa ilang lugar ug manghasi kon mahubog, asawa maoy pahimungtan.
“Samot na nga ingnon sab siya sa asawa nga “gusto ka motorjak, unya mokupos man diay,” kutlo ni Millor sa sulti ni Rene.
Si Rene nga nahinabi sa Superbalita Cebu niangkon sa krimen, apan nangayo siya og pasaylo sa iyang asawa ug mga anak.
Matod niya nga iyang natigbasan si Arnel kay maoy mobabag nilang magtiayon kon mag-away.
Tulo ka higayon na silang nagkabangi sa iyang anak kay molaban sa iyang mama. Nibahad sab kini maong iyang giunhan.
Si Rene niangkon nga siya nahiubos sa iyang asawa kay di makig-sex kaniya.
Di na modulog niya, adto na matulog sa pikas lawak tupad sa iyang anak babaye ug apo.
Sumala pa niya nga kapoy siya kay manguling matag adlaw sa bukid, inig pauli niya gusto siyag karenyo sa iyang asawa, magpapisil sa lawas ug pamasahi, apan maglikaylikay na.
Unya nahibaw-an niya nga mosuroy sa mga silingan hinungdan nga iyahang maymayan nga maglikay kay daghang tsismosa.
Kon iya nang sugdan og romansa, iwakli iyang kamot ug mobalhin sa pikas lawak.
Gumikan niini nagduda siya nga dunay laing lalake ang iyang asawa.
Kanunay na lang silang mag-away kay dali-dalion siya nga “sama og manok nga mahuman dayon pag-upa.”
Kasong frustrated ug attempted parricide ang iyang atubangon nga kaso.