Ang disenyo sa usa ka arkitekto sa Sicat Design Services ang napili sa National Quincentennial Committee (NQC) nga gamiton alang sa umaabot nga Lapulapu National Monument.
Samtang, upat ka mga taga Cebu ang giila sa NQC nga mananaog sa minor prizes sa upat ka tema sa painting category.
Si Rex B. Sicat Jr., 26, ang giila nga grand prize winner sa Lapulapu National Monument Design Competition. Siya ang principal architect sa Sicat Design Services nga nagbase sa Tarlac, probinsiya sa Luzon.
Ang iyang pagkadaog gianunsyo sa NQC niadtong Pebrero 26, 2021.
Ang disenyo ni Sicat nga gipanguluhan og “The Watch of Mactan” nagpakita sa pagbantay ug pagpangandam ni Datu Lapulapu sa pag-abot ni Ferdinand Magellan ug iyang mga galyon sa isla sa Mactan.
Makadawat si Sicat og P300,000 isip prize money, certificate of recognition ug mga commemorative items gikan sa NQC ug National Historical Commission of the Philippines (NHCP).
Sa painting category, adunay upat ka tema diin upat ka taga Cebu ang nakadaog sa minor prizes. Kada tema adunay duha ka minor prize winners ug usa ka grand prize winner. Makadawat ang minor prize winners og tag P50,000 kada usa. Ang grand prize winner makadawat og P500,000.
Ang mga mananaog nga taga Cebu mao sila si:
* Sovereignty: Jesus D. Rona of Cebu City for “Triumph of Lapulapu” (acrylic on canvas)
* Magnanimity: Darby Vincent Alcoseba of Lapu-Lapu City for “Magnanimity” (oil on canvas)
* Unity: Wilfredo Cañete Jr. of Talisay City for “Sandugo” (oil on canvas)
* Legacy: Ariel N. Caratao of Lapu-Lapu City for “Ang Mahinungdanong Pag-abot sa Balaang Bata” (oil on canvas)
Ang tanang winning paintings ibutang sa umaabot nga Lapulapu Memorial Shrine and Museum in Mactan, Lapu- Lapu City.
Gilusad sa NQC ang Quincentennial Art Competition niadtong 2020 isip pagsaulog sa 500th anniversary sa Philippine part sa first circumnavigation of the world apil na ang Kadaugan sa Mactan. Niabot og 434 entries. Gianunsyo ang winners niadtong Pebrero 26, 2021. (MPS)
(Ang tanang imahe gikuha gikan sa Facebook page sa National Quincentennial Committee)