MIABOT na ang grasya gikan sa Tsina, nga 600,000 ka doses nga Sinovac nga bakuna batok sa Covid-19. Grasya tungod kay donasyon man kini sa Tsina alang sa atong nasud. Sa ato pa, way kwarta nga migawas sa panudlanan sa atong kagamhanan. Niadtong Dominggo gisugat ni Presidente Duterte ug mga kauban ang pag-abot sa Sinovac sa tugpahanan sa Villamor Airbase sa dakbayan sa Pasay.
Samtang si DOH Secretary Francisco Duque III nagpahibawo nga moabot kagahapon adlawa ang 525,600 ka tupok nga AztraZeneca-Oxford nga bakuna gikan sa Englatera. Pulong pa ni Kon. Joel Garganera, deputy implementer sa Cebu City Operations Center, ang iyang gibati morag “nitugdon na ang agila” sa dihang miabot na didto sa kaulohan ang mga bakuna batok sa Covid-19. Apan, kanus-a man moabot ang bakuna alang sa Dakbayan sa Sugbo ingon man sa tibuok probinsya?
Dili malalis nga angay ta malipay sa pag-abot sa bakuna batok sa Covid-19 kay sa tibuok kanasuran ang atong nasud maoy pinakauwahi nga nakakuha og bakuna. Ang nasud sa Indonesia maoy nag-una dinhi sa Asya. Unsaon, man nga daghan man kaayo ang cheche-bureche nga storya usa maka-order og bakuna sa mga parmasyotika, nga nagbuhat sa bakuna.
Apan, matod sa mga eksperto, ang maturokan og bakuna dili man garantiya nga di na mataptan sa Covid-19 tungod kay usa lang kini ka proteksyon nga dili na delikado nga mamatay ang tawo sa Covid-19. Sa ato pa, naa gihapon sa atong kaugalingon ang pagmatngon ug pagtuman sa mga health protocol.
Gani, sa gipamulong na ni Presidente Duterte bisan og miabot na ang bakuna ug maturokan na ang mga tawo base sa prayoridad di gihapon siya mosugot nga ablihan ang mga eskuylahan ug ibalik ang naandan nga pagtuon nga naa sa sulod sa classroom ang mga bata o estudyante sa ilang eskuylahan. Hinuon, buot na ni Presidente Duterte, nga ibalik ang naandan nga kalihokan sa atong ekonomiya.
Sa ato pa, mahimo na mangabli ang mga sinehan, ang mga turismo nga dapit sa nagkalainlain nga mga probinsya modawat na sa mga turista gikan sa lain nga dapit nga wa na magkinahanglan og medical certificate, nga ang usa ka turista wala magdala og virus. Apan, pila ra man ang mabakunahan sa ingon ana ra kadaghan nga bakuna?
Unta, ang Tsina puslan man nga nangangkon sa mga isla sa atong nasud mihatag na lang og usa o duha ka bilyun ka doses nga bakuna nga donasyon, apan mogawas nga morag bayad sa mga isla nga ilang giangkon aron daghan ang mabakunahan nga libre labina sa mga lungsod ug probinsya nga dili adunahan sama sa Cebu.
Ang akong gibalak-an nga moingon nya ang kagamhanan sa Tsina nga kanang ilang gidonar nga 600,000 ka doses nga bakuna mao na ang pasiuna nga bayad sa mga isla nga ilang giangkon ug ang atong nasud dili na moapil sa gihimo nga naval exercise sa Amerika ug Europa diha sa West Philippine Sea. Hinumdumi nga si Presidente Duterte nagpasidaan nga di siya mosugot nga moapil ang atong nasud sa maong ehersisyo.