Editorial Cartoon by Ariel Itumay
Editorial Cartoon by Ariel Itumay

Editoryal: Pagpabakuna, ayaw kahadlok

NIABOT na ang unang batch sa bakuna batok sa coronavirus disease (Covid-19) sa nasod. Ang 600,00 ka doses sa CoronaVac gikan sa China gidonar alang lang unta sa armadong kusog sa nasod, apan gusto ni Presidente Rodrigo Duterte nga unahon ang medical frontliners una pa ang unipormadong mga personnel. Apan problema karon sa kagamhanan mao ang pagkombinser sa katawhan nga magpabakuna. Ngano kaha kon nganong mapanagan-on ang katawhan? Kini tungod sa kasinatian sa Dengvaxia sa publiko nga diay, dunay di maayong epekto sa mga bata nga wa pay dengue fever.

Lahi sa Dengvaxia, ang mga bakuna batok sa Covid-19 miagi og makuti nga mga pagtuon pinaagi sa mga trial una pa hatagi og sertipiko alang sa mass vaccination. Bisan ang Department of Health (DOH) nag-umol og team aron maoy motuon sa nagkadaiyang mga bakuna. Busa, gawas nga nipasar kini sa evaluation sa gawas sa nasod, mismo ang mga eksperto sa Pilipinas nitando niini.

Naay uban nga nahadlok sa bakuna kay gikan sa China. Apan kataw-anan huna-hunaon nga ang ubang mga nasod sa Southeast Asia, sama sa Singapore nga taas kaayo og standard, apil sa nikuha sa CoronaVac kun Sinovac aron idugang sa mga dose nga gipamalit.

Tinuod, dunay pipila ka mga tawo nga nangamatay human bakunahi. Apan wa pa say conclusion nga sila namatay tungod sa Covid-19 vaccine. Hayan dunay laing hinungdan. Busa, bisan ang mga doktor, sa di pa mobakuna sa pasyente, kuhaan og medical history aron pagsuta kon angay ba siyang dapatan sa bakuna. Di kay si bisan kinsa ang matusokan niini.

Pastilan, ang advanced nga mga nasod nag-ilugay sa mga bakuna aron mahibalik na sa normal ang kinabuhing naandan, kita sa Pilipinas nangahadlok pa tungod lang sa mga balita nga way igong basehanan. Ang hulga sa Covid tinuod samtang ang kakuyaw mugna ra sa huna-huna. Mosanta ni sa kamatayon.

Related Stories

No stories found.
SunStar Publishing Inc.
www.sunstar.com.ph