DUGANG 19 ka mga kaso sa coronavirus disease (Covid-19) ang natala sa Cagayan de Oro sulod sa duha ka adlaw, pulos kini mga local transmissions, sumala sa report sa City Health Office Lunes, Marso 1, 2021.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 3, 800.
Sumala ni Acting City Health Officer Dr. Lorraine Nery, sa 19 ka mga bag-ong lokal nga mga kaso, 10 ang mga close contacts sa mga pasyenteng nagpositibo sa coronavirus, lima ang mga local authorized persons outside residence (Apors), ug upat ang mga local index nga mga kaso.
Sa 3,800 nga kinatibuk-ang kaso sa Covid-19 sa syudad, 422 ang mga returning overseas Filipino workers/locally stranded individuals (ROFs/LSIs) ug 3,378 ang mga local transmissions.
Matud ni Nery, sa 3,378 nga mga local nga kaso, 186 ang mga persons deprived of liberty (PDLs), 1,781 ang mga local index cases, ug 1,409 ang mga local cases with link.
Ang Cagayan de Oro adunay 185 ka mga active cases, 43 niini na-admit sa Northern Mindanao Medical Center ug uban pang mga ospital sa syudad ug 142 ang mga outpatients.
Nakatala usab og 21 ka mga Covid-positive nga mga kaso nga karon naka-recover. Anaa na karon sa 3,433 ang ihap sa mga nakarekober nga mga kaso sa dakbayan.
Sa maong numero, 302 ang mga LSIs, 119 ang mga ROFs, ug 3,012 ang mga lokal nga kaso (community: 2,563; Apors: 449).
Ang ihap sa mga namatay sa Covid-19 sa syudad naa sa 182.