TACURONG CITY -- Patay ang usa ka trahabante sa konstruksiyon nga gidunggab sa amahan sa iyang asawa alas 7:25 sa gabii, Lunes, Marso 1.
Giila ang namatay nga si William Acosta, 39, samtang ang suspek nga umagad mao si Diosdado Rana, mag-uuma ug pulos nagpuyo sa Purok 4, Barangay Malegdeg, Senator Ninoy Aquino, Sultan Kudarat.
Sumala kang Police Master Sergeant Eric Vasques, imbestigador sa President Quirino Municipal Police Station, nga hubog nga nahiabot ang biktima sa ilang balay ug nakalalis niini ang iyang asawa nga si Helen Acosta, 38.
Wala makapugong si William sa iyang kaugalingon sa sobrang kasuko, gisumbag niya ang iyang asawa.
Mikuha sab dayon og mahait nga kutsilyo ang amahan sa babaye ug gidunggab niya sa makaduha ka higayon si William, kinsa gidali pagdala ngadto sa Senator Ninoy Aquino Municipal Hospital apan gideklara kini nga dead on arrival human nakaangkon og samad sa kilid sa tiyan ug dughan.
Boluntaryo sab nga mitahan sa kaugalingon ang umagad ug gitakda nga pasakaan og kasong pagpatay. (Edgar E. Fuerzas)