Pusher giniyutralisa

LAING gituohang drug pusher na sab ang napatay sa kapulisan sa Davao City human alegasyong misukol sa operatiba sa San Pedro Police Station atol sa buy-bust operation alas 11 sa gabii niadtong Lunes.

Patay na nga miabot sa ospital ang usa ka gituohang tigpayuhot og ilegal nga druga sa M.I.H, Barangay 8-A, Davao City.

Sa impormasyon gikan sa Davao City Police Office, mibunlot og .38 revolver ang suspek nga si Richard Panal Opada 47-anyos, usa ka laborer alas 11 sa gabii niadtong Lunes.

Dugang nasayran nga dihang nangabot na ang ka transaksiyon sa suspek dali kining miambak kilid sa sapa ug midagan padung sa kuwarto, apan naa sab pulis nga nag-atang niini.

Gilayong giniyutralisa ang suspek sa operatiba sa San Pedro Police Station apan dead on arrival kini sa ospital.

Unom ka mga putos sa pinauga nga dahon sa Marijuana ug tulo ka mga pakite sa gituohang shabu ang nakuha sa posisyon sa suspek. (Jeepy P. Compio)