DAVAO DE ORO -- Nakubkoban na ang 70 anyos nga lola nga natabunan sa midahili nga yuta apan patay na didto sa Dampakan sa Purok 22, Barangay Mount Diwata, Monkayo alas 10 sa buntag kagahapon, Martes, Pebrero 2, 2021.
Ang biktima nga giilang si Rizalda Matambonoy giingong nalubong sa nahitabong landslide ala 1 sa hapon niadtong Lunes, Marso 1, 2021.
Sa pakighinabi sa Superbalita Davao kang Carlos Pasagaran Jr., operation head sa Municipal Disaster Risk Reduction Management Office (MDRRMO)-Monkayo, gibutyag niini nga gawas kang Matambonoy, duna say duha ka minero nga pulos nagpangedaron og 40 anyos ang nangaangol apan anaa na sa luwas nga kahimtang.
Samtang upat sab ka mga balay ang naguba human nalakip sa nahagsaan sa lapok sa Dampakan sa mga waste materials sa dapit.
Apan giklaro ni Pasagaran nga walay nahitabong ulan sa dihang midahili ang yuta nga mipaingon sa kabalayan, dayong midiretso sa Provincial Road, hinungdan nga di kini maagian.
Apan daling gilihok sa lokal nga panggamhanan sa lungsod hinungdan nga dali ra sab nga naagian ang maong dalan.
Nasayran nga alas 8:30 sa buntag, kagahapon, mibalik sa area ang mga personahe sa MDRRMO alang sa retrieval operation hinungdan nga naugkat ang biktima nga si Matambonoy. (Dexter Visitacion)