Gipahibalo sa Children’s Legal Bureau (CLB) sa publiko ang pag-withdraw niini sa pagtabang sa mga ginikanan sa usa sa mga unom ka mga estudaynteng Lumad nga nabilin diri sa Sugbo ug anaa karon sa kustodiya sa Department of Social Welfare and Development (DSWD) sa Sugbo.
Niadtong Pebrero 15, 2021, dunay 19 ka mga estudyanteng Lumad ang gikuha sa kapolisan gikan sa usa ka retreat house sa University of San Carlos-Talamban Campus.
Ang maong kalambolan gumikan sa kasayuran nga ang inahan sa usa ka 17 anyos nga babaye nga estudyanteng Lumad mibiyahe gikan sa Sultan Kudarat paingon sa Sugbo niadtong Pebrero 25 kauban ang representante sa ilang local social welfare and development office (LSWDO) aron bawion ang bata. Wala hinoon nakighisgot ang inahan sa maong bata sa CLB sa wa pa kini miabot sa Sugbo.
Ang mga ginikanan sa maong batang Lumad nangayo og tabang sa CLB pinaagi sa pagtubag sa among online legal assistance form nga mahimong maablihan bisan asa sa Pilipinas.
Nag-schedule dayon og video conference ang mga manlalaban sa CLB kauban ang mga ginikanan sa maong bata apil na ang inahan nga niari sa Sugbo aron masusi ang pagkatawo sa mga ginikanan ug ilang mga dokumento ug pagkompirma kon tinuod nga nangayo sila og abag gikan sa CLB.
Ang pagduol nila sa CLB nahitabo niadtong Pebrero 22, usa ka adlaw human nabutang ang kustodiya sa ilang bata ngadto sa DSWD.
Sa maong conference, ang mga ginikanan sa bata nagpatabang sa CLB sa pagpahibalo sa DSWD sa ilang gusto nga babagan ang paglarga sa ilang bata nga walay pagtugot gikan kanila ug pagtudlo sa CLB nga maoy tagaan og kustodiya sa bata hangtod maabot sila diri sa Sugbo aron pagkuha sa bata.
Gisusi sa mga representante sa CLB ang DSWD pagkasunod nga adlaw, Pebrero 23, aron pagkomprima kon nahimutang didto ang ilang bata.
Ang case manager sa DSWD mokimpirma nga ang maong bata anaa sa ilang kustodiya ug giila ang partisipasyon sa CLB sa pagtabang sa mga ginikanan sa mga bata human mopakita kini ug mga dokumento kabahin sa ilang request.
Tungod kay naabot naman ang inahan diri sa Sugbo, makonsiderar nga gikanselar sa mga ginikanan ang pagpangayo og tabang sa CLB. Girespetar sa CLB ang desisyon sa mga ginikanan nga mukuha sa bata kon kini makaayo sa ilang anak.
Hinuon, andam ang CLB sa paghatag og assistance sa maong mga ginikanan kon subling mangayo sila og tabang.
Sa laing bahin, mi-request na ang CLB og imbestigasyon ngadto sa Mandaue City Police Office kabahin sa insidente sa red-tagging o pagpasangil nga ang CLB usa ka communist terroristgGroup nga tataw sa posters nga gipamilit dapit sa Cebu International Convention Center (CICC).
Giklaro sa CLB nga kanunay kining nakig-coordinate sa mga law enforcement agencies sama sa kapolisan sa mga child-related nga mga kaso sama sa trafficking and online sexual exploitation of children (Osec). Mihatag sab ang CLB og trainings ngadto sa mga naglangkob sa Women and Children Protection Desks (WCPDs).
Nisuway sab og sumpay ang CLB ngadto sa kapulisan human nga dunay pipila ka mga ginikanan sa mga estudyanteng Lumad gikan sa Talaingod, Davao Del Norte nga nangayo og legal assistance. Tungod sa dugay na nga kasinatian sa pakig-coordinate ug pagkooperar tali sa CLB ug law enforcement agencies, ang seryusong allegasyon nga usa ka communist terrorist group kay walay basehan.
Bisan pa man sa mga hitabo, mopadayon ang CLB sa pag-alagad sa mga panginahanglanon sa child survivors ug pagtabang sa among stakeholders ug sa publiko sa kinatibuk-an alang sa kaayuhan sa atong mga bata.
[Mahimo kamo nga mopadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]