Gipahibawo sa kapulisan sa Siyudad sa Sugbo nga nadugangan na usab ang ilang persons under police custody (PUPC) nga nagpositibo sa coronavirus disease human sila gipaubos sa swab test sa miaging semana.
Nigawas ang resulta niadtong Dominggo, Pebrero 28, 2021.
Matod ni Police Lieutenant Colonel Wilbert Parilla deputy city director for operations sa Cebu City Police Office (CPO) nga moabot ngadto sa 13 ka dinakpan sa Labangon Police Station ang na Covid.
Apan pito nalang ang nagpabilin sa temporary detention cell sanglit ang upat ang na commit na sa Bureau of Jail and Management and Penology (BJMP) sa Cebu City Jail samtang ang duha nakapyansa na.
Tungod niini, gipang isolate ang pito sa selda sa babaye ug wala lang una manawat og babayeng dinakpan ang Labangon Police Station.
Kon duna silay madakpan, gimandoan ang hepe niini nga dalhon sa CCPO headquarters.
Lakip sa kamandoan mao ang pagpa swab test sa tanang madakpan una pa sila ipasulod sa selda aron masiguro nga way nag dalag virus sa Covid-19.
Dugang ni Parilla nga dunay mga pulis nga naka close contact sa mga binilango, dili kini angay nga ikabalaka kay matod niya ang mga imbestigador nga maoy naghawid sa ilang mga kaso pulos nag sul-ob og personal protective equipment (PPE).
Wa na mokompyansa ang kapulisan sa siyudad sa Sugbo sanglit usa kini sa hinungdan nga misaka ang gidaghanon sa mga pulis nga natakdan sa virus niadtong miaging tuig.
“So far ang atung gihimo ang tanang mosud or tanang arrested sa mga police stations i-undergo gyud swab test tanan, para mahibaw-an gyud kon naa bay nag positive,” matod ni Parilla.
Pasabot usab ni Parilla nga ang tanang mga dinakpan nga gagmay lang ang salaod nga nahimo, apan nasulod sa selda ug nakapiyansa, di nila diretso nga buhian tungod kay ilang ihatod sa barangay isolation area alang sa pito ka adlaw nga quarantine kon asa sila namuyo. (AYB)