Durugista nga gilambigit sa pipila ka mga pagpamatay sa ilang barangay nadakpan sa buy-bust sa Regional Police Drug Enforcement Unit (RPDEU)-7 sa Lunes sa gabii, Marso 1, 2021 sa Sityo Naba, Barangay Mambaling, Siyudad sa Sugbo.
Si Police Major Glenn Hife, nangu sa buy-bust, niila sa suspek nga si Roy Carulasan, 45, taga sityo Naba, Barangay Mambaling. Nakuhaan usab og armas nga 9mm si Carulasan gikan sa iyang hawak.
Samtang dakpan usab ang bataan niini nga si Siegfred Badonio, 31, taga Tupas S., sa Barangay Sawang Calero, ning siyudad.
Nasakmit gikan sa duha ang mga pinutos nga shabu nga motimbang og 20.95 gramos nga mobalor og kapin sa P189,000 base sa Dangerous Drugs Board (DDB) value.
Ang Mambaling Police Station, dihang nasayod, nga nadakpan si Carulasan, ila kining giadto ang dapit sanglit si Carulasan gitumbok suspek sa tulo ka insidente sa pagpamusil patay sa Barangay mambaling.
Si Police Major Francis Renz Talosig, kanhi hepe sa Mambaling Police Station, apan naa na karon sa Mabolo Police miingon nga taud-taud na nilang gipangita si Carulasan.
Dugang ni Talosig nga si Carulasan ang gitumbok nga mipusil patay sa usa ka lalake sa Sityo Naba niadtong Hunyo sa miaging tuig.
Siya sab ang suspek sa pagpatay nga nahitabo tungod sa ilang panimay sa milabay nga tuig.
Siya usab ang suspek sa pagpusil sa usa ka frontliner sa milabay nga tuig.
Si Carulasan niangkon nga siya ang nipatay sa us aka tawo tungod sa ilang balay, apan wa siyay labot sa laing duha.