SUPERBALITA CEBU

Diputado: Kataw-anan pero makalagot

Cuentas Claras

Nalipay na unta ko nga miabot na gyod sa Pilipinas ang Covid vaccine, aron matabangan na ang mga nanginahanglan niini. Apan naunsa ba kini, misamot man kalibog akong kutaw.

Duna koy nabasahan nga gikan sa Center for Disease Control (CDC) bahin sa mga sintomas sa Covid nga angay mahibaw-an sa tanan.

Gilista ang most common symptoms, less common symtoms ug serious symptoms sa Covid.

Ubos sa less common symptoms, mao kining mosunod: muscle pain, headache, sore throat, new loss of taste or smell, congestion or runny nose, nausea or vomiting and diarrhea.

Pero matod pa sa balita kagahapon, sa 13 ka mga tawo nga gi-injectionan sa China-made CoronaVac, ang usa nag-hypertension, ang tulo dunay arm pain, ang usa dunay rashes o pangatol, ang usa dunay paglabad sa ulo (headache) unya ang usa dunay “nauseous experience o pagsuka-suka. Wala na mahibaw-i pa og unsay gibati sa nahibiling unom.

Matod pa sa DOH, dili kita angay mabalaka.

Pero kon imong tan-awon, ang miresulta nga mga symptoms gikan sa pag-injection sa CoronaVac, mao-mao sab sa symptoms sa less common symptoms sa Covid, matod pa sa CDC.

Kinsa kahay makahatag og katin-awan ani noh?

* * *

Matod pa sa usa nga gi-injectionan sa CoronaVac, nakahunahuna na lang siya nga magpabakuna kay nakita niya ang daghang mga pasyente nga nangamatay tungod kay wala madapati sa tambal sa Covid. Labi na gyod kay namatay sila nga nag-inusara ug wala diha ang sakop sa iyang pamilya.

Nagpasabot ba kini nga kon mabakunahan na og CoronaVac, dili na matakdan sa Covid?

Matod sa usa ka doctor nga akong gipangutana, mahimo gihapon nga matakdan bisan kon nabakunahan na, mao man gani kini rason nga padayon gihapon ang pag-gamit sa mask, face shield, social distancing ug hand washing bisan nabakunahan na.

Ang nakaparat ra ba kay katingad-an ang pag-apil-apil ni Health Secretary Francisco Duque panahon sa pagbakuna si miaging adlaw.

Base sa protocol, kadto lang nag-edad og dili molapas sa 59, kanang dili pa senior citizen, ang mahimong mobakuna sa CoronaVac.

Apan si Duque nga 64 na ang edad, mao gyod ang nangunay pagbakuna.

* * *

Ang gihimo ni Secretary Duque klaro nga kalapasan sa protocol. Apan bisan pa niini, iya gihapon kining gihimo.

Tungod ba kay atol sa iyang pagbakuna, diha ang taga-media nga nag-cover sa maong panghitabo? Mas importante ba ang photo-ops kay sa pagsunod sa protocol?

Nagpasabot ba kini nga mahimo lang supakon ang protocol basta Cabinet secretary lang?

* * *

Mao kini ang kataw-anan nga makalagot pod.

Kon mosaka ang presyo sa pagkaon, unya motiyabaw ang mga tawo, sama sa mag-panic dayon ang gobiyerno.

Price freeze dayon.

Dili na pwede nga mamaligya og sobra sa presyo nga gitakda. Dakpon ang mosupak.

Pero kon sobra gani ka-us-os ang presyo sa pagkaon sama sa baboy, manok, o bisan gani ang presyo sa mga utanon o kaha mga prutas, walay ganahan maminaw sa reklamo sa mga mag-uuma.

Dunay maximum nga presyo pero walay minimum nga presyo sa mga pagkaon.

Buot ipasabot, kon sobra kabarato ang pagkaon, alkanse ang mga mag-uuma ug dili na sila ganahan pa nga mopadayon kay lugi man ilang puhunan.

Walay motabang kanila aron dili sila maalkanse. Walay subsidy kanila, dili parehas sa mahal ang presyo nga dunay subsidy gikan sa gobiyerno.

Husto ba kini?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph