Daghan ang mga negatibo nga komentaryo kalabot sa CoronaVac, bakuna batok sa coronavirus disease (Covid-19), tungod lagi kay gikan sa China. Pun-an pa sa mga estorya nga 50 percent ra ang kaepektibo niini.
Gipasabot na sa mga doktor kon unsa ang kahulogan niini. Gani, daghan na man sa mga medical frontliner ang nagpatusok ning pasiunang mga bakuna nga nangabot. Bisan ang ubang mga nasod namalit ug nag-inilugay pa sila.
Matod sa Butantan biomedical center sa Brazil nga maoy partner sa Sinovac, ang CoronaVac nga maoy unang niabot karon sa Pilipinas epektibo sa mas gikahadlukan nga strain, African ug British variants nga gikabalak-ang di madutlan.
Ang tanang mga bakuna batok sa Covid-19 nga gipanggama sa lainlaing pharmaceutical companies sa kalibutan puro nakita nga epektibo batok sa Covid-19 base sa lainlaing clinical trials.
Kining mga panaway nga nangtumaw karon sagad gisambugan og pulitika ug gipaypayan sa mga tawo nga di gusto nga mamahimong malampuson ang vaccination program sa kagamhanan. Daghan ang mga disinformation nga nakaapekto na hinuon og maayo sa health program sa gobiyerno, sama sa pagpamakuna batok sa polio ug uban pa.
Niresulta na gani kini sa pagpamalik sa mga sakit nga katuigan nang nasumpo tungod sa di hustong mga impormasyon batok sa mga bakuna. Dako kaayo og kalainan ang bakuna batok sa mga sakit ug Dengvaxia. Bisan gani ang mao nga bakuna epektibo man sa mga tawo nga nasakit og dengue. Kadto rang mga tawo nga wa pa matapti og dengue ang nag-ungaw sa kakuyaw kon natusokan.
Kon gusto ang katawhan nga mahibalik na sa normal ang kinabuhi nga kapin na sa usa ka tuig nga giguba sa coronavirus disease (Covid-19), kinahanglan magpatusok sa bisan unsang moabot nga bakuna nga gipalit sa kagamhanan. Kay mao ra kini ang bugtong paagi nga makabalik kitag tan-aw og sine, makakape sa coffee shops ug mabalik na ang mga klase.