SUPERBALITA CEBU

Gen. Feliciano mouna og pabakuna

GUWARDIYADO: Gi­ban­tayan pag-ayo sa kapulisan ang kargamento nga gisudlan sa 7,200 ka doses sa Sinovac Covid-19 vaccines nga miabot niadtong Martes sayo sa buntag, Marso 2, sa tugpahanan sa Mactan. / ALAN TANGCAWAN

Aron nga kahatagan og kumpiyansa ingon man kadasig ang publiko mahitungod sa bakuna batok Covid-19, ang chief implementer sa Inter-Agency Task Force for the Management of the Emerging Infectious Diseases (IATF-MEID)-Visayas, retired general Melquiades Feliciano, maoy una nga magpabakuna.

Gikatakda nga sa Huwebes, Marso 4, 2021 ang ceremonial inoculation sa Sinovac Covid-19 vaccine.

Kini maoy gipahibawo ni Dr. Mary Jean Loreche, chief pathologist ug tigpamaba sa Department of Health (DOH) 7.

Samtang si DOH 7 Regional Director Jaime Bernadas nagkanayon nga mangayo una siya og clearance gikan sa iyang doktor ilabi nga dili siya kuwalipikado sa age group nga 18 ngadto sa 59 anyos nga mapabakunahan.

Base sa uwahing datos sa Vicente Sotto Memorial Medical Center (VSMMC) aduna nay 768 ka mga health care workers sa maong tambalanan ang narehistro aron nga bakunahan sa Sinovac vaccine.

“What we have right now, the 7,200 doses, these are initial doses. We are expecting another batch to arrive, around 7,800 doses, this March 8,” matod ni Loreche sa mga tigbalita.

DI DIAY PFIZER



Gitug-an ni VSMMC chief Dr. Gerardo Aquino nga mikunhod ang gidaghanon sa health workers nga mipadayag sa interest nga magpabakuna sa dihang nasayran ang lahi nga brand sa bakuna ang unang miabot.

“We have 600 workers who already gave their informed consent. Initially, there were 2,900 but there were changes in the plans, especially when they learned that Pfizer won’t be the first to arrive. Some hesitated and were worried,” matod ni Aquino sa Marso 2.

MANDAUE CITY



Aduna nay 1,616 ka mga medical workers ang narehistro nga isip vaccine recipient gawas sa 2,000 nga target sa dakbayan sa Mandaue base sa datos sa Mandaue Vaccine Board sa miaging semana.

Kini nga mga medical workers gikan sa mga medical facility sa gobyerno sa dakbayan, mga pribadong klinik ug mga pribadong medical facility gawas sa mga pribadong ospital.

Matod ni Ernie Manatad, ang chairman sa Vaccine Board ug ang Association of Barangay Captain (ABC) president nga gisugdan na nila ang ilang pagrehistro ug paghimo sa ilang masterlist sa mga priority group.

Gawas sa mga medical workers, sugdan na sab nila ang pagparehistro sa mga frontliners sa local government unit ug mga senior citizens.

Kini human, napaubos na sa orientation ang mga kawani sa barangay kung unsaon pag-encode sa mga profile sa mga vaccine recipient sa database sa dakbayan nga gihimo sa Mandaue City Management Information System Office (MISO).

Apan, giklaro ni Manatad nga wa magpasabot nga nagparehistro sila bakunahan na dayon sila. Sigon niya nga kinahanglan pa sab nila tan-awn ang health history sa usa ka tawo o ang health declaration niya aron mahibaw-an kung angayan ba sila nga bakunahan.

VENDORS, DRAYBER ISUNOD



Bisan wala pay tubag gikan sa DOH Central Office desidido si Lapu-Lapu City Mayor Junard Chan nga isunod pagpabakuna sa mga frontliners ang mga vendor ug drayber sa mga pampublikong transportasyon sa dakbayan.

Si Chan nisuwat ngadto kang DOH Secretary Francisco Doque III kalabot sa ilang plano.

Sukwahi sa lista sa prayoridad sa ahensya nga senior citizens ang sunod unta sa mga medical frontliners.

Buot ni Chan nga mga drayber ug vendors ang mas una nga priority inay ang mga senior citizens sanglit sila ang kanunay mag-atubang ug lain-laing tawo matag adlaw, samtang ang mga senior citizens anaa ra sa ilang tagsa-tagsa ka panimalay.

“Wa pay reply by the DOH but sa regional level acceptable nila ang atoang request nga katong non-health workers frontliners maoy atong unahon,” matod ni Chan.



SABTON LANG



Samtang si Cebu City Mayor Edgardo Labella mosabot kon adunay mga Sugbuanon nga dili magpabakuna sa Sinovac.

“As I have said before, we will give them the opportunity to choose. Naa sila’y katungod nga mobalibad ug mohulat sa laing brand sa vaccine that the City Government will purchase once naa na and approved by the FDA.” matod pa sa mayor. (WBS, ANV, KFD, GCM, PAC)

VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph