Step bro suspek sa pagpatay
Ang stepbrother sa 11 anyos nga babaye nga napalgang patay sa kalibunan sa Purok 2, Barangay Tubigagmanok, Lungsod sa Asturias, Sugbo ang gitumbok nga suspek sa gidangatan sa bata.
Ang patay nga lawas ni Antonette Andare, lumolupyo sa maong dapit, ang napalgan niadtong Lunes, Marso 1, 2021 sa 11 sa buntag nga naghay-ad na nga way sapot ang ubos nga bahin niini.
Matod ni Police Staff Sergeant Bernadette Tapilot, hepe sa Women’s Children Protection Desk sa Asturias Police Station, napalgan si Antonette sa usa ka 15 anyos nga iya ra sab nga silingan sa dihang paingon unta kining maligo.
Ang nahimutangan sa lawas ni Antonette dili ra layo sa mga kabalayan.
Sa gihimong follow-up operation gisignit sa kapulisan si Raymart Compra, 18, stepbrother ni Antonette. Si Raymart ipon ra sab sa gipuy-an ni Antonette.
Ang amahan ni Raymart ug ang inahan ni Antonette mag-live-in partner.