Evaluation sa road-clearing sa Dakbayan sa Sugbo nga gimando sa Department of the Interior and Local Government (DILG) gisugdan niadtong Martes, Marso 2, 2021 pinaagi sa pagsusi sa kadalanan sa siyudad.
Mga ahensya nga nipahigayon sa evaluation gilangkuban sa Bureau of Fire Protection, Philippine National Police (PNP) ug mga sakop sa World Vision Development Foundation.
Ang mga dalan nga unang gisusi naglakip sa dalan J.Panis, Sikatuna, Pelaez, T. Padilla, Spolarium, Climaco, Tupas, A. Gabuya, Sabellano ug uban pa.
Sa nanglabay nga mga semana, ang Cebu City Transportation Office (CCTO) nang clamp sa four-wheeled nga mga sakyanan nga gipang-park daplin sa mga karsada sa dakbayan.
Ila usab nga gipangkarga ang mga motorsiklo nga gibilin usab sa mga sidewalk.
Hugot kining gipatuman sa Dakbayan kay ang matag usa ka sakyanan nga makit-an sa sidewalk nga ilegal nga gi-park usa ka point na nga kuhaon gikan sa score sa Siyudad sa iyang road-clearing operation.
Ang illegal parking nag-unang suliran sa mga local government unit (LGU) sa Metro Cebu. (REV)