PATAY ang duha ka barangay kapitan sa Tarangnan, Samar human gipamusil sa riding in tandem.
Ang insidente nahitabo sa karsada sakop sa Barangay Balugo, Tarangnan, Samar, alas 8:40 sa buntag, Miyerkules, Marso 3, 2021.
Ang mga biktima giila nga sila si Bonifacio Babon, 63, kapitan sa Barangay Marabut; Amelita Helbolario, kapitana sa Barangay Awang ug ang drayber sa motorsiklo nga si Elpidio Babon.
Ang kapulisan sa lungsod nakadawat og tawag gikan sa usa ka concerned citizen bahin sa maong insidente.
Dali nga niresponde ang kapulisan aron susihon ang maong report.
Base sa inisyal nga imbestigasyon sa kapulisan, nagsakay sa motorsiklo ang mga biktima paingon Tarangnan proper aron motambong sa meeting sa Municipal Peace and Order Council (MPOC) ug Liga ng mga Barangay.
Pag abot sa lugar nga nahitaboan, niabot ang riding in tandem ug gipamusil ang mga biktima gamit ang kalibre .45 nga pistola.
Dead on the spot ang duha ka Babon samtang dali nga gidala sa tambalanan si Helbolario apan gideklara kini nga dead on arrival.
Dali nga misibat paingon sa direksyon sa Catbalogan ang mga responsable.
Blangko pa usab sa pagka karon ang mga awtoridad sa motibo sa krimen ug padayun pa ang imbestigasyon ug pag ila sa mga responsable. (JKDP)