PRESIDENTE sa Association of Barangay Captains (ABC) sa lungsod sa Hinunangan, Southern Leyte nasikop sa gipahigayon nga anti-illegal drugs operation sa Philippine Drug Enforcement Agency (PDEA) ug kapulisan.
Giila ang dinakpan nga si Romeo Ochea Saturinas, 57, minyo, taga Barangay Pondol, Hinunangan.
Matod sa mga awtoridad, nalista isip high value target si Saturinas gumikan sa iyang kalambigitan sa ilegal nga drugas bisan sa iyang pagka opisyal sa lungsod.
Ang buy-bust gilusad alas 5:35 sa hapon, Lunes, Marso 1, 2021 didto sa karsada sakop sa Barangay Canipaan.
Matod sa report sa kapulisan, usa ka nagpailang mamalitay ang nakig transaksyon sa suspek.
Dugang pa sa report, napalitan og usa ka medium size nga pakete sa gituohang shabu ang suspek nga mobalor sa P20,000.
Nagpaila dayun ang mga awtoridad ug gi-anunsyo ang pagdakop sa suspek.
Human sa buy-bust, gikapkapan dayun ang suspek atubangan sa mga opisyal sa barangay ug media.
Nakuha gikan sa posisyon sa suspek ang laing tulo ka pakete sa gituohang shabu.
Base sa report sa PDEA, ang mga shabu mga nakuha nitimbang og 12.1 gramos ug dunay kinatibuk-ang kantidad nga P82,866.
Naa na karon sa kustodiya sa kapulisan ang suspek ug gipasakaan na og kasong may kalapasan sa Dangerous Drugs Act of 2002. (JKDP)