MAAYONG adlaw nga Supersuki. Nalipay ka na ba nga duna na kitay vaccine sa atong nasud kontra sa Covid-19 virus?
Malipayon nga nagpabakuna ang mga medical workers o mga frontliners aron ipakita ang ilang pagsalig sa kaayohan nga ikahatag sa mga vaccine nga niabot sa atong nasud.
Usa kini sa pagmatuod pinaagi sa pagtahan sa ilang kaugalingon aron mahanaw ang kahadlok sa uban nga dunay tinagoan nga kadaut ang moabot sa tawo nga gibakunahan sumala sa gipakatag sa mga kontra sa vaccine sa panahon nga kini gimugna pa lang.
Ang uban nagpakuyanap sa balita nga mahimo kuno nga micro chip ang kemikal sa vaccine ug mahimong paagi sa pagdawat sa patik sa mananap nga mapintas, ang 666 nga gihisgutan sa Bibliya sa basahon ni Juan Revelador sa Pinadayag.
Ang kahadlok kon dili pa hingpit ang imong pagsalig, modala og daghang epekto tungod magasugod kini sa atong utok.
Gani man, sumala sa pagtuon, daghan ang naga-antus og mga balatian tungod sa dili husto nga pagbalanse sa hunahuna.
Dunay pipila sa gibakunahan nga nakit-an sa negatibo nga epekto apan kadali lang ug pipila lang sab.
Ang mga "Influencer" buot unta magpabakuna aron makadugang sa pagsalig ug paghupay sa kahadlok sa uban nga naa pa sa pagduha-duha sa vaccine, gibalibaran tungod unahon usa ang mga frontliners kay limitado pa ang supply.
Sa hinay-hinay, mabalik na ang pagsalig sa katawhan ug mabalik na unta ang paglambo sa atong ekonomiya kon mausab na ang atong kahimtang gikan sa new normal, balik sa naandan nga normal sa wa pa ang Covid-19.
Sa natad sab sa politika, halos sa tanang dapit sa nasud makita na ang mga tarpaulin nga nag-awhag kang Mayor Sara Duterte-Carpio aron padaganon sa 2022 pagka-pangulo sa nasud. Nagpakita kini nga organisado ang mga suporter ni Mayor Sara sa tibuok nasud ug andam sila sa umaabot nga bugnong lugaynon.
Sa gipagula nga resulta sa survey sa mga posibleng mahimong kandidato, nag-una si Mayor Sara sa nagustohan sa katawhan apan ang iyang amahan, si President Rodrigo Duterte lang ang dili gusto, kay alang kaniya dili angay sa babaye ang pagka- pangulo tungod sa kalisud sa responsibilidad.
Dili lalim nga mga problema nga midasmag sa administrasyon ni President Digong labi na sa pagsulod sa Covid sa atong nasud. Wala pay nahibalo sa moabot nga mga suliran sa nabilin nga mga bulan sa iyang pagdumala. Hinaut nga wala na unta. Hinuon, iyang nadumala ang nasud luyo sa unos sa iyang administrasyon.
Ang ginapaabot sa katahan karon mao nga iyang buhian si Mayor Sara ug moduyog sa pag-ingon "Run Sara Run" alang sa katawhan.
Mga katawhan nagapaabot nga itugpo na ni President Digong sama sa tabanog ang iyang anak, ug sama sa iyang pagsalig sa vaccine, mawala ra ang iyang pagduha-duha inig abot na sa tukma nga panahon.