KIDAPAWAN CITY - Napuhag sa mga pulis ang sabong-sabong nga gihimo alas 10:30 sa buntag, Martes, Marso 2, 2021, sa usa ka barangay sa Arakan, North Cotabato.
Atol sa ronda naaresto ang napulo ka mga tawo kon diin lima niini dayo gikan sa Barangay Mintal, Tugbok District, Davao City nga sila si Dante Baon Ansano, 57; Larry Paras Ansano, 28; Arnel Belandres Casiano, 33; Kenneth Sencio Baton, 20; ug Mark Butil Sambugan, 34.
Apil sa mga nadakpan mao sila si Mark Paul Alcuzera Tondog, 30; Rufinito Bayo Sabaysabay, 57, nagpuyo sa Barangay Lanao Kuran, Arakan; apil sab sila Melchor Awe Layuran, 52; usa ka sakop sa Cafgu Active Auxiliary (CAA) nga nadestino sa Meroy Detachment, ilawom sa Charlie Company sa 16th Infantry Battalion, Philippine Army ug Larry Pugo Ytang, 48, mga nagpuyo sa Barangay Tumanding, Arakan Cotabato, lakip na si Emilio Hicoli Asusina, 36, nagpuyo sa Barangay Allab, Arakan.
Sumala kang North Cotabato Police Provincial Director Colonel Henry Villar nga nakadawat og taho ang Arakan Municipal Police Station sa mga nagsabong-sabong sa Sitio Meroy sa Barangay Tumanding sa maong lungsod. Busa daling mihimo og operasyon ang kapulisan hinungdan sa pagkasikop sa mga nahisgutan.
Hinuon giingong dunay naka-eskapo sa maong ronda, apil ang usa ka Rogelio Lumunday nga giingong maoy nagpasiugda sa sabong.
Narekober sa mga pulis ang mga manok panabong, kuwarta, tally sheet sa mga nag-sideline og pa-last-two lakip na last-3 ug 14 ka mga motorsiklo.
Mga narekober nga ebidensiya naa na sa Arakan MPS samtang ang mga nadakpan gipasakaan og kasong kalapasan sa Presidential Decree 1602. (Edgar E. Fuerzas)