MOHATAG og ganti nga P300,000 ang lokal nga kagamhanan sa Davao City sa makatudlo sa nagpatay sa 47-anyos nga babaye nga taga Buhangin.
Ning kasamtangan, padayon ang gihimong makuti nga imbestigasyon sa Buhangin Police Station sa kamatayon sa biktima nga napalgan sa kasagbutan sa Ladislawa Village, Barangay Buhangin Proper, Davao City.
Sumala sa Davao City Police Office (DCPO) nga naa nay giimbestigahan karon ang Buhangin police human napalgan ang patay’ng lawas sa biktima nga 47-anyos, alas 4:30 sa hapon, Lunes, Marso 1, 2021.
Una niini, usa ka flower vendor ang nakadungog sa tingog sa biktima nga nangayo og pakitabang, mga alas 4 sa hapon niadtong Pebrero 28.
Gibaliwala lamang sa flower vendor ug nagtuo siyang nag-away lamang nga magtiayon nga anaa nagpuyo sa dapit.
Apan nianang mga taknaa, ang bana sa biktima nga 50-anyos natagbaw na og pangita sa iyang asawa.
Wala suma kini kauli human nananghid nga moadto sa usa ka tailoring shop sa San Pedro Village, Buhangin.
Dunay mga istorya nga migula sa social media nga ang biktima gibaligya sa giingong higala diin usa ka ML player ang gituohang mipatay sa biktima.
Giingong gilugos una ang biktima ayha kini gipatay kinsa nakahiagom og mga samad ug bun-og sa kalawasan.
Suma sa DCPO, usa ka scientific investigation ang ilang gilusad aron matugkad ang motibo sa krimen.