Adunay tulo ka mga kompaniya nga gustong magporma og team sa Philippine Basketball Association (PBA) taliwala sa mga kahasol nga gisagubang sa liga ning panahon sa pandemya.
Matod sa usa ka kasaligang tinubdan, ang maong mga kompaniya andam magtukod og expansion team o kaha mopalit og kasamtangang prankisa sa liga.
“Meron at least tatlo [na interesado],” matod sa tinubdan sa interbyu sa Spin.ph.
Giklaro sa tinubdan nga ang maong kompaniya ningpadayag na sa ilang interes nga mosulod sa labing unang professional nga liga sa Asya sa wala pa ang hulga sa coronavirus disease 2019 (Covid-19).
Hangtod karon, wala mawagtang ang interes sa maong mga kompaniya, pagtino sa tinubdan.
Ang nakaapan lang, dili pa uyon ang PBA board nga modawat og expansion team ning higayuna.
Gani sa iyang termino isip commissioner, si Willi Marcial wala sukad nakahisgot kabahin sa pagdawat og expansion team.
Usa sa dakong rason nga supak ang PBA board ning maong ideya mao ang bati nga performance sa Blackwater Elite ug Terrafirma Dyip, nga mao ang labing ulahing ningsulod sa liga.
Sukad sa ilang pag-abot sa liga niadtong 2014-15 season, ang duha ka teams nagkumboya og 97-265 nga rekord ug pulos kini wala pa nakatilaw og daog sa playoff.
Tungod niini, ang PBA maglisod pag-market sa mga duwa sa duha ka teams sa television broadcast ug live audience.
Bisan pa niini, adunay beterano nga mga personalidad sa PBA nga dakong uyon nga magdugang na og teams ang liga.
Usa niini si NLEX Road Warriors coach yeng Guiao. (ESL)