KON way kakulian, dako ang posibilidad nga mahinayon na gyud kining gipaabot nga panag-engkuwentro tali ni eight-division champion Manny Pacquiao ug undefeated Terrence Crawford.
Wa man tuoy igong dapit nga nabutyag kon asa kini ipahigayon, apan wa usab isalikway ang posibilidad nga adto kini sa mahitabo sa Midde East.
Pero ang labing siguro nga kon mahingpit na ang negusasyon, karong tuiga kini ipahigayon ug labing dugay sa bulan sa Mayo o Hunyo.
Kining maong panag-engkuwentro niadto pang 2015 gihugonhugon, apan daw ug dili interesado ang beteranong promoter nga si Bob Arum sa Top Rank Promotion.
Niadtong higayona, si Arum pa maoy promoter ni Pacquiao ug ni Crawford, so dali ra unta kaayo to nga mahitabo.
Apan nagtuo si Arum nga niadtong panahona, nahimutang sa peligrusong sitwasyon si Pacquiao tungod kay edaran na kini kon iparang sa batan-on ug sa nagsaka nga abilidad ni Crawford.
Pero sa niaging tuig, nausab ang panglantaw ni Arum, ilabi na nga wala na sa iyang poder si Pacquiao human kini mibalhin ngadto sa Premier Boxing Champions.
Wala na kini maghisgut og edad. Ang 33-anyos nga Crawford (36-0, 27 KO) mao karon ang WBO welterweight champion.
Samtang si Crawford ubos sa pagdumala ni Arum, ang iyang mga dekalidad nga mga kaatbang sa maong division atoa sa PBC. Gawas ni Pacquiao, anaa sab sila si Errol Spence, Danny Garcia, Keith Thurman ug Shawn Porter.
So ang nahitabo, gusto unta sa PBC nga si Pacquiao paawayon ni Porter kay lagi dali ra kay pulos anaa sa ilang poder.
Apan sa wala damha, mitumaw ang pangalan ni Crawford kay sa survey mao man gyuy gipangita sa mga boxing fans.
Katapusan kining nakaaway niadtong Nobiyembre 14, 2020 didto sa MGM Grand sa Las Vegas diin niya gipaundang sulod lang sa upat ka round si Kell Brook.
Samtang si Pacquiao, (62-7-2, 39 KO) niadto pang July 2019 katapusang nakaaway diin iyang gipildi pinaagi sa split decision ang kanhi undefeated nga si Thurman.
Batok ni Thurman, gawas sa edad, wa kaayo siya mabintahai tungod kay hataas man ang panahon nga wa makaaway si Thurman.
Pero batok ni Crawford, duha na ka pabor nga nabintahaan ang fighting senator.
Gawas sa edad, hapit na usab moduha ka tuig nga wala siya kaaway. Dili malikayan nga basin sama sa niagi niyang pipila ka away, bagal ug hinay ang iyang movement.
Mao ni usa sa mga rason kon nganong inilog si Crawford.
Apan dili kini bag-o nga sitwasyon alang ni Pacquiao. Pila na ka higayon nga biya siya sa masyada, apan pila na usab ka higayon nga taliwala niini siya nagmadaugon. (jun.migallen22@gmail.com)