CARMELO D. LARIOSA
San Fernando, Cebu
Kon wa pa lang ako badlonga ni Lolo Isko
Manamilit akong maghilak nga maglukon
Sa pisi sa akong kabaw nga nagtiyabaw.
Apan bug-at ang tingog sa akong apohan
Daw ang tumbagang kamot nga mikumot
Sa luoran kong mga kamot.
Matod niya ang tanan nahisulat na sa palad
Ug bisan gani ang mga saad mahimong
Lukuton sa sukwahi nga kapalaran.
Apan gusto ko nang mobiya sama sa
Pagsawop sa adlaw kay ang katahom
Sa kabuntagon di man diay tinuod.
Ug ako andam nang mobiya aron kon ako
Tua na didto luyo sa habog nga bungtod
Ang tanan mosalop uban sa hapo nga adlaw
Ug ang tanang kapakyasan ning dughan
Ikuyog ko didto sa dapit sa mga damgo.
Tugtugon ko ang buak nga gitarang bagol
Ug unya mosakay ako sa akong damgo.
Ingnon ko si Lolo Isko sa iyang katulugon
Nga ang tanan niyang gisulti tinuod.