LAMBERTO G. CEBALLOS
Ilaya, Cawayan, Dalaguete, Cebu
Manag-kauban sila si Treb ug si Ellen sa gitrabahoan nilang pabrika sa sapatos sa dakbayan sa Carcar. Ambungan si Treb ug maanyag si Ellen. Sa edad nga bayenti tres, maguwang si Treb og duha ka tuig kang Ellen. Puros sila way kabilinggan sa kinabuhi. Nahigugma si Treb kang Ellen, apan wala siya makapadayag sa iyang pagbati kay siya kulhanon basta bahin sa gugma ang hisgutan.
Usa ka buntag nagkadungan pag-abot ang duha sa ilang gitrabahoan, Nagsul-ob si Ellen og puting T-shirt nga may sepra sa dughan: TUTOK RA BA. IBOG KA?
“Nindot imong T-shirt, Len. Nagsulti sa tinuod,” dayeg ni Treb’
“Mao ba diay, Treb?” ni Ellen nga nagpahiyom.
“Mao kaayo,” ni Treb.
Pagka sunod adlaw gihatag ni Ellen ang T-shirt kang Treb.
“Nasayop ka, Len, sa imong pagtuo. Wa ko maibog sa T-shirt mo, apan ako ning dawaton aron di ka moingon nga nag-insulto ko nimo,” ni Treb.
“Wa ko na kalabhi. Ikaw na lang laba ana,” ni Ellen.
Nakaingon si Treb sa iyang hunahuna nga maayo sab hinuon nga wa labhi ni Ellen ang T-shirt. Nasingo pa niya ang kahumot sa agwa ni Ellen nga ‘Forest Interlude.’ Apan ang naka-imbudo, kay nahimo siyang insomyak dihang iyang gi-punda ang T-shirt sa iyang unlan. Kada gabii dili siya mahikatulog sa paghinunahuna sa katahom sa panagway ni Ellen.
Usa ka adlaw nagsul-ob og pula nga T-shirt si Treb. Siya mismo ang nag-imprinta sa sepra: GIHIGUGMA KO IKAW! Didto sila niadtong higayuna nag-esnak sa Jollibee duol sa pabrika.
Mikatawa pag-ayo si Ellen, “Hahaha! Hahaha! Hahaha!”
Nahisagmuyo si Treb. Nahisama siya sa nahilis nga ice cream diha sa ilang lamesa sa kantalita ni Ellen. Milingiw siya ug didto motan-aw kang Jollibee nga bisag wa maglihok didto sa gawas, nagpahiyom kini kaniya.
Nianang misunod nga semana sa ‘birthday’ ni Treb, gihatagan ni Ellen si Treb og T-shirt nga si Ellen mismo ang nag-printa sa sepra nga I LOVE YOU TOO! Misangko sa langit ang kalipay ni Treb. Daw may buntog nga mikapakapa sulod sa iyang dughan.
Pagka sunod adlaw gisul-ob ni Treb ang T-shirt nga sineprahan og dako kaayong THANK YOU! (KATAPUSAN)