DAW naibtan og tunok si City Administrator Floro Casas Jr. sa pagkasikop sa duha ka mga tawo nga giingong nigamit sa iyang ngalan aron kilkilan ang mga contractor ug supplier sa Cebu City Government.
Sila si Reihan Abusaman Hunti, 32, nagpuyo sa Pari-an Pension sa Barangay Pari-an, Dakbayan sa Sugbo, ug Marythel Nicolette Niere, 34, nagpuyo sa Palm Hills Subd., Barangay Basak, Mandaue City nasikop sa entrapment operation sa Regional Drug Enforcement Unit (RDEU) sa alas 8 sa gabii, Marso 2, 2021, sa Crossroads, Barangay Kasambagan, Dakbayan sa Sugbo.
Si Police Major Glenn Hife maoy nangu sa operasyon pag-entrap kanila ni Hunti ug Niere, inabagan sa Regional Special Operations Group (RSOG) 7.
“Nalipay ug na-relieved ko kay akoy gidaot aning mga scalawags kay akoy gipasanginlan nga nangayo og kwarta gikan sa mga contractors unya aduna tay pangalan nga g-protektahan ug apil sa madaot si Mayor (Edgardo) Labella,” padayag ni Casas.
Matod ni Casas nga niabot sa iyang buhatan ang reklamo human nidangop ang usa ka contractor kaniya.
“Naay contractor niduol diri sa atong office allegedly claiming nga si Niere nangayo og P3 million to a contractor in exchange to a project from the City ug ang giingong nagsugo ni Niere kay ako,” butyag ni Casas.
Si Casas niingon nga ang ka-transaction sa contractor mao ang nagpaila nga Atty. Ahkmad gikan sa EC Labella Law Office nga maoy law firm ni Labella.
Didto ilang nailhan nga di tinuod nga abogado ug ilang nailhan nga si Hunti nga kakonsabo ni Niere.
“Based on the document nga naa namo, kadaghan na ni nila buhata, last year pa. Ug mao ni ilahang modus, manawag sa mga supplier, contractor sa City para mangayo og kwarta in-exchange sa project sa City Hall,” dugang ni Casas.