SUPERBALITA CEBU

Editoryal: Kanunaya ang pagbadlong

Editorial Cartoon by Ariel Itumay

Mipasigarbo ang Siyudad sa Sugbo nga 24 na ka mga karsada sa siyudad ang nabutangan og bike lanes sukad giumol ni Mayor Edgardo Labella ang Sugbo Bike Board. Gipasikad ni Labella ang pagtukod sa board ug pagpamutang og bike lanes sa usa ka ordinansa sa Siyudad nga naaprobahan sa Konseho niadtong 2014.

Apan sukad sa pagsugod sa pagbutang sa bike lanes, daghang netizens ang nakakita sa mga sakyanan nga naghimo sa bike lanes nga parking area. Unsa diay ang bike lanes, parking area sa mga sakyanan?

Tuod, gipang clamp sa mga enforcer sa Cebu City Transportation Office (CCTO) ang mga sakyanan nga gipang-park sa bike lanes. Apan di permanente ang ilang kampanya, di sama sa overnight parking nga kanunay matag kaadlawon hangtod sa buntag.

Pinaagi man gud sa pagbadlong ug pagsilot sa mga nakalapas nga tag-iya sa mga sakyanan, maedukar og anam ang publiko kalabot sa katuyoan sa bike lanes hangtod nga ila kining tahuron.

Ambot kon napahibawo na ba usab sa board ug CCTO ang publiko nga ang gipamutang nga bike lanes mao ang gitawag og sharrow. Sa sharrow bike lanes, mahimong moagi ang ubang mga sakyanan, four-wheeled o mga motorsiklo, apan di sila makasapaw kon dunay biker nga moagi. Sa ato mohatag og lugar ang mga sakyanan kon dunay biker nga moagi o magsubay.

Wa magpasabot nga mahimo nang mohunong ang mga sakyanan nga nakatama sa bike lane. Kinahanglan nga kanunay nga hawan ang bike lane sa mga nakababag alang sa kaluwasan sa mga nagbiseklita. Ang kaluwasan mao ang nag-unang katuyoan sa pagbutang og bike lanes.

Bisan tuod kon ideal unta ang exclusive bike lane, sama sa Dakbayan sa Mandaue, apan mao man kini ang nalatid sa ordinansa sa Siyudad. Bisan na unta kon sharrow, hinaut nga kada adlaw lantawon sa CCTO ang mga lanes kon wa bay nagtungtong nga mga sakyanan.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!