GIHALAD sa tigpamaba sa Department of Health (DOH) 7 Dr. Mary Jean Loreche ang iyahang pagbulontaryo nga unang mabakunahan sa Covid-19 vaccine sa mga mipanaw nga healthcare workers nga lakip nila nga miatubang sa pakigbatok sa hulga sa maong virus.
Si Loreche mao ang usa sa nabakunahan atol sa gihimo nga Covid-19 Ceremonial Vaccination nga gipahigayon sa dakbayan sa Sugbo kagahapon, Marso 4 sa Vicente Sotto Memorial Medical Center.
“I would always remember our fallen colleagues as they fought Covid with us," si Loreche nagkanayon.
Unang nakadawat sa CoronaVac nga Sinovac ang medical chief sa VSMMC nga si Dr. Gerardo Aquino.
Mismo si DOH Undersecretary Dr. Gerardo Bayugo, ang pangu sa Field Implementation and Coordination Team ang mihimo sa pagtusok kang Aquino.
Misunod usab sila si Loreche; Dr. Juanito Tiu, medical chief sa St. Anthony Mother and Child Hospital; Dr. Pythagoras Zerna, medical chief sa Eversley Childs Sanitarium and General Hospital, ug si Major General Melquiades Feliciano, ang pangu sa Inter-Agency Task Force for Covid-19 sa Visayas.
Ang maong mahinungdanon nga kalihokan gitambungan kini ni Presidential Spokesperson Secretary Harry Roque.
Wala mahinayon og abot si Health Secretary Dr. Francisco Duque III kini human nangandam kini aron mosugat sa miabot kagabii nga laing brand sa CoronaVac nga AstraZeneca.
Matod ni Roque nga moabot sa 487,200 ka doses sa maong bakuna ang naabot sa nasod sakay ang commercial flight.
Si Aquino sa iyang bahin nibutyag usab nga niabot na sa 1,245 ka mga healthcare workers sa VSMMC ang mipadayag sa ilahang gusto nga magpabakuna gikan sa sumatotal 2,987 ka healthcare workers sa maong tambalanan.
Dugang ni Aquino nga aduna sila'y Quick Substitution List diin mao kini ang lista sa ubang healthcare workers nga gusto na nga magpabakuna apan dili nila empleyado.
Lakip niini ang healthcare workers sa St. Anthony Mother and Child Hospital, Eversley Childs Sanitarium and General Hospital, Cebu South Medical Center, ug mga healthcare workers sa DOH 7.
Anaa sa 50-70 ka healthcare workers ang gibakuhanan kagahapon atol sa ceremonial rites samtang moabot sa 400-500 ka mga healthcare workers ang target nila matag adlaw nga mabakuhana sa mosunod nga mga adlaw.
Si Roque misaysay na nga unahon og hatag ang CoronaVac sa mga healthcare workers diin mauna niini ang anaa magtrabaho sa Covid-19 referral hospitals.
Sundon kadtong anaa sa pribado nga hospitals ug uban nga healthcare workers lakip na ang mga barangay health workers.
Sa pagkakaron wala pa'y ensakto nga petsa kon kanus-a mahatagan sa bakuna nga AstraZeneca ang Sugbo.
Apan base sa taho sa Office of the Presidential Assistant for the Visayas, aduna'y dugang 9,640 ka Sinovac vaccines ang maabot karong adlawa.
Anaa sa 8,440 ka doses ang gialokar alang sa Governor Celestino Gallares Memorial Hospital (GCGMH) sa Tagbilaran City, Bohol ug 1,200 ka doses alang sa Silliman University Medical Center Foundation, Inc. sa Dumaguete, Negros Oriental.
Mapasalamaton usab si DOH 7 regional director Dr. Jaime Bernadas kang OPAV Secretary Michael Lloyd Dino tungod sa padayon nga suporta nga gihatag niini sa ahensiya sa padayon nga pakigbatok sa ahensiya sa pandemya.
Lakip nga misaksi sa maong ceremonial rites sila si Cebu City Vice Mayor Michael Rama, Mandaue City Mayor Jonas Cortes, Lapu-Lapu City Mayor Junard "Ahong" Chan, ug si Chinses Consulate-General sa Cebu Jia Li.