SA SUBLING pag-abli sa Island Garden City of Samal alang sa mga bisita, Marso 1 gilayong ko nga nagpa-booking sa resort aron mahatagan ko'g QR code pass.
Tuod man, toa nami sa dapit uban sa akong duha ka barkada, naglingkod kos ilawom sa landong sa kahoy nga talisay ug gilayong nabuhi sa akong panumdoman ang mga kakulit sa akong mga barkada sa mga pangutana, pipila ka bulan na ang milabay.
Daghan man gud ang nanguntana nga mga higala nako ngano daw emosyonal kaayo ang akong mga posts sa Facebook, ug dayon ko silang gitubag nga ang tanan, drama lamang.
Nahimot ang bisan kinsa nako nga higala kung madunggan akong tubag, ug diha sa'y uban nga di gyud motuo nga drama lang, kay kabalo daw sila sa unod sa akong pagbati.
Giingnan ko dayon sila nga kung kinsa ang nakabalo sa akong pagbati, sila kadtong makasabot sa akong mga posts, apan ang dili, nakasabot sab sila nga namakak ko dihang miingon ko nila nga usa lamang ka drama.
Kini ba ang giingon nga bisan nasakitan ka sa usa ka panghitabo, ipakita gihapon nga daw wala kita natandog sa nahitabo kanato?
Sa laktod, kining giingon nga, naka-move on na, pero nagpabilin pa diay ang samad sa kasingkasing, gumikan kay di kita gustong mawala ang usa ka tawo sa atong kinabuhi, kini man sa hisgutanang gugma ug ang sa atong minahal nga miyembro sa pamilya.
Diha'y panultihon nga giingon, "Goodbyes are not forever nor not the end; it is simply means I'll miss you, until we meet again," sa ato pa bunga lamang diay sa panamilit ang kamingaw, ug maabot ang panahon nga magkita ra gihapon, di man sa buhi pa, kun di didto sa laing kalibutan.
Husto, apan lisod nga dawaton ang panamilit labi na'g di ka gustong mahitabo kini taliwala sa inyong masadya nga panag-uban.
Gani diha ko'y higala nga gihatag pa niya ang gikinahanglan sa iyang hinigugma, unya miabot ang punto nga iyang gipanid-an ang batasan ugaling wala siya'y mahatag.
Gisulayan niya, ug didto nakita gyud ang tinuod nga kolor, nga wa diay gugma kaniya iyang partner, gipanguwartahan ra diay siya, suma niya, konsensya nalang ang mopukaw kaniya.
Sa sambingay bitaw, motugpa man gyud ang alibangbang sa nagbukad pa kaayo nga bulak, kay kung wala na kini mibukad, wala manay alibangbang nga motugpa niini, kay di naman niya mapuslan, palaya naman.
Mao nang kung duna man tay hinigugma, masayran lang gyud diay nato nga nahigugma gyud sila, kung mapakita gihapon nila ang ilang walay kondisyon nga gugma luyo sa kasakit ug kalisod sa mga higayon.