SALISI ang nahitabo, dili pagpanulis, suma sa Talomo Police Station human madagit sa kanhi pump boy ang mokabat kapin kun kulang P50 mil sa gasolinahan nga iyang kanhi gi-trabahoan alas 8 sa buntag niadtong Miyerkules sa Ulas, Davao City.
Sa official statement sa Talomo Police Station, dili tulis ang nahitabo ug imposible kini nga mahitabo sanglit dunay police outpost kilid sa maong gasolinahan.
Sa paspas nga follow-up operation sa Talomo police, nasikop ang suspek nga si Kevin John Pagar, 27 anyos, pump attendant sa Shell Matina Branch, ug residente sa Block 1, Puan, Barangay Talomo, Davao City.
Nasayran nga kalit gisulod sa suspek ang clerk booth ug gikuha ang kuwarta nga mokabat sa P54,260.
Dihang nakabantay ang biktima, gitionan pa kini og mahait nga butang sa suspek, apan wa kini masayod nga nadala na diay ang salapi.
Sumala sa suspek nga nahimo niya ang pagkuha sa salapi gumikan sa iyang panginahanglang pinansiyal.
Narekober ang salapi sa posisyon sa suspek kinsa anaa na kini karon sa selda sa Talomo police kinsa gipasakahan na og kaso didto sa korte. (Jeepy P. Compio)