Si Metro Cebu Water District chairman Joey Daluz mi-resign isip sakop sa Partido Barug. Kining maong partido gipangulohan ni Bise Mayor Mike Rama nga nakig-abin sa Partido Demokratiko ng Pilipinas – Lakas ng Bayan (PDP-Laban) nga maoy gisakyan ni Presidente Rodrigo Duterte sa imaging piniliay.
Ang gihatag nga katarungan si Daluz nganong miguwa siya sa maong partido kay iya kunong buhi-on ang Partido Panaghiusa sa iyang inahan, anhing Inday Nita Cortes Daluz. Kining Panaghiusa natukod niadtong 1987 isip usa ka partido politikal sa Cebu City ug tibuok lalawigan sa Sugbo. Ang nagrehistro niini mao sila si anhing Sonny Osmeña ug karon bise mayor Rama. Ambut og buhi pa ba kini karon nga nagtukod naman si Rama sa iyang Partido Barug, usa ka local political party samtang si Osmeña nagtukod usab og Organized Support for the Movement to Enhance the National Agenda (OSMENA), usa ka national political party. Laing national party mao ang Provinces First Development Inititiative (PROMDI) ni Achilles Cañete sa ngalan ni kanhi Gob. Lito Osmena.
Sa listahan sa Commission on Elections (Comelec), ania ang dugang mga partido local: Bando Osmena – Pundok Kauswagan (BO-PK) ni kanhi mayor Tomas Osmena; Pusyon Bisaya ni kanhi Comelec commissioner Casimero Madarang, Jr; Abante Anak Bisaya ni Gerardo Carillo; Barug Alang sa Kauswagan ug Demokrasya (BAKUD) ni Danao city Mayor Ramonito Durano; Alayon Alang sa Kalambuan ug Kalinaw (ALAYON) ni Kongresista Eduardo Gullas; Kugi Uswag Sugbo (KUSUG) ni kanhi mayor Alvin Garcia; ug One Cebu ni Gob. Gwendolyn Garcia. Suma sa record nga ang Panaghiusa “succeeded by Partido Barug.” Buot ipasabut gitukob na ang Panaghiusa sa Barug? Kon mao kinahanglang buhi-on kini ni Daluz.
Dako kining trabaho alang kang Daluz kay nagkinahanglan kini og dakung salapi ingon man political clout aron pagdani sa mga pulitiko nga may pangalan nga moipon kaniya. Apan sumala sa record nga kining Barug ug Panaghiusa usa ra.
Daghang buot masayud kon unsa gayud ang tinuod nga katarungan sa paguwa niya sa Barug. Nahiubos ba siya kang Bise Mayor Rama o duna bay mga sakop sa maong partido nga iyang nakabangga? Kining pag-resign niya sa Barug maghatag og dugang katarungan sa ubang mga pulitiko sa pagbantay ug pagsaway sa iyang mga lihuk. (mannyrabacal1144@gmail.com)