SUPERBALITA CEBU

Barrita: Usa ka tuig nga bakasyon

Tikdul-Tikdol

NALINGAW mo sa hapit mag-usa na ka tuig nga bakasyon? Ang usa ka tuig nga bakasyon kinutlo gikan ni Presidential Spokesman Harry Roque Jr. Matod niya, “Napakatagal na po nating nakabakasyon, halos isang taon na tayong nagbakasyon dahil sa Covid-19.”

Si Danilo Ramos, chairman sa Kilusang Magbubukid ng Pilipinas (KMP), niingon nga si Roque maoy angay nga mobiya sa puwesto ug magbakasyon kay ang gisulti niya insulto sa minilyon ka mga Pilipino nga nawad-an sa ilang mga trabaho ug panginabuhian.

Nangayo’g pasaylo si Roque kay wa hisabti ang pamahayag niya atol sa usa ka virtual press conference. Nunot ni sa pangutana kon bakwion ba sa Presidente ang deklarasyon nga ang All Souls’ Day, Christmas Eve ug New Year’s Eve himuon na lang nga mga special working days imbis special non-working holidays.

* * *

Unsa may epekto kon himuon na lang nga special working days ang Nobyembre 2, Disyembre 24 ug Disyembre 31? Ang mga trabahante nga nagtrabaho sa maong mga adlaw di na makadawat sa dugang 30 porsento sa ilang minimum daily wage.

Matod pa ni Roque ang tumong niini mao ang pagtabang sa pagbangon sa ekonomiya sa nasod. Ang buot niyang ipasabot sa usa ka tuig nga bakasyon di gyud bakasyon, kon di, nga wa makatrabaho ang mga tawo tungod sa Covid-19 pandemic.

Usahay, ang mga pulong nga malitok sa usa ka tawo di haom sa iyang buot ipasabot. Kon atong tan-awon, hayahay ang tawo nga nagpahuway ug naa ra pirmi sa balay. Apan kon way trabaho ug way makaon, magkutoy ang iyang tiyan.

* * *

Matod pa ni Roque, ang mga tawo nga naa ra sa balay mora’g nagbakasyon, wa gyud magbakasyon. Apan kay miabot na ang bakuna batok sa Covid-19, mamawi ta sa panahon nga nausik. Matod pa niya, “Siguro naman po, ngayong andito na ang bakuna, hayaan naman nating maka-recover tayo for lost time.”

Gisugdan na niadtong Lunes ang coronavirus vaccination program sa Pilipinas. Nahimo kini tungod sa donasyon sa kagamhanan sa China sa 600,000 ka Covid-19 vaccine shots gikan sa Sinovac Biotech sa maong nasod.

Manghinaot kita nga tungod sa bakuna maundang na ang hapit mag-usa ka tuig nga bakasyon ug makatrabaho na kita. Basta di na bakasyon ha.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph