KON si Bise Mayor Mike Rama ang pabut-on, dili siya gusto nga pahamtangan pa og bug-at nga silot ang mga makalapas sa mga quarantine protocols nunot niining atong pagpakigbatok sa pandemiya. Kay matod pa niya nag-antos na ang katawhan gumikan sa atong nasinati nga pagkahagba sa ekonomiya. Daghang mga negusyo ang nanira ug daghang ang mga tawo nga nangawad-an og trabaho ug panginabuhian. Unya imo pa silang silutan. Dili bug-at nga silot ang gikinahanglan kon dili self-discipline lang, matod ni Rama.
Nindot unta paminawon kanang maong mga pulong sa bise mayor. Kana kon ang mga tawo na gyud ang mohimo niana. Apan sa atong sosyidad o sa klase sa atong pagkatawo, daghan ba ang mosagop anang giingon sa bise mayor nga self-discipline? Ambot lang og paminawon ba kaha na sa kadaghanan aron ato kanang makab-ot. Sayon ra kaayo na estoryahon, apan lisod buhaton.
Ang pagpahamtang og silot pinasubay kana sa atong mga balaod, lokal o nasyonal. Ang atong matag balaod naa nay gitawag nga penal clause o bugti nga silot pinasikad usab sa salaod nga nahimo. Ngano man? Aron madisiplina ang katawhan ug walay mangahas sa pagsupak sa balaod sa kagamhanan. Kay kon wala kitay balaod nga nagtangag og multa, mora ra tag “Gobiyerno ni Sabas Boang.”
Ang krisis sa Covid-19 maoy usa ka krisis nga adunay duha ka igo alang sa mga kabus. Kon di ka maigo sa kagaw, ari ka patya sa kagutom. Sayon ra alang sa mga tawo nga wala maglisod ang pagtambag og self-discipline aron pagbuntog sa krisis. Ug sayon ra sab sa taga gobiyerno ang pagpagawas og mga hulga sa silot alang sa mga kabus nga nanginahanglan nga mogawas aron manginabuhi.
Wa man god sila masayod sa kinabuhi sa mga kabus nga ang panginahanglan para mabuhi gikuwenta ang matag minuto ug oras. May pandemiya man o wala. Ang ilang pagkamas aron makakaon way hunong ug kana mao ang labing lisud nga sabton sa mga gamhanan ug adunahan ning atong nasud.
(bobbygnalzaro@gmail.com)