GIDAKOP pinaagi sa entrapment ang usa ka babaye ug lalake nga giingong nigamit sa ngan ni Cebu City Administrator Floro Casas Jr. sa giingong pagpangkilkil sa mga supplier ug contractor nga gustong mosulod sa City Hall.
Si Marythel Nicolette Niere niingon nga duna siyay higala nga mo-contact kaniya kon dunay proyekto ang Siyudad ug uban pang mga kasayuran kalabot sa proyekto. Samtang si Reihan Hunti niingon nga igo ra siyang tigdawat sa kuwarta, apan wa siya masayod unsa ang transaksyon.
Kon tinuod ang sulti ni Niere, sa ato pa, dunay ikatulo nga tawo nga nalambigit sa pagpangilkil. Kon kinsa man kini, angay kining iyang ibutyag aron mahukasan ug makiha.
Kon di kawani sa City Hall si Niere, unsaon man niya pagkahibawo kon kinsa ang mga contractor ug supplier sa Siyudad? Kinsa ang nihatag kaniya og mga impormasyon kalabot sa mga nangapil ug kinsang tawhana ang kontakon aron maoy pangayoan o padug-on? Naa gyud sa sulod ang tinubdan sa mga kasayuran kay particular na kaayo ni nga impormasyon. Anha ni sa mga dokumento nakabutang.
Kon tinuod man nga sukad pa sa 2020 kini gibuhat sa duha, nganong karon pa ni nahibaw-an?
Gikinahanglan nga di lang ang pagpasaka og kaso maoy atimanon ug seguraduhon nga kon duna may kunsabo sa sulod, ilakip kini sa pagkiha. Kay mas daku og tulubagon ang mao nga tawo o mga tawo. Kini aron sa paglimpyong hingpit sa adminisrasyon karon ug way magduda nga dunay gitabunan.
Kay kinsa ba ang motuo nga ang duha lang ka mga suspek ang nagbahinay sa bisan unsang kwarta nga ilang gipangayo? Naa gyud ni silay padrino nga mas daku og partisipasyon. Gawas kon ang duha gihimo lang mga sacrificial lamb kun kanang termino nga maoy gilawog sa tirong. Samtang ang mga kamot nga mas hugaw pa, makalingkawas nga way tatsa.