MAHIMO na nga mobukas pagbalik ang internet cafes sa lungsod sa Balamban.
Kini subay sa kamandoan Executive Order No. 4 nga giluwatan ni Balamban Mayor Alex Binghay.
Ang maong lakang subay sa inanay nga pagpaluag sa restrictions ubos sa modified general community quarantine (MGCQ).
Subay sa kamandoan sa mayor, gitugotan nga makasulod sa establisimento ang mga indibidwal nga nag- edad 15 hangtod sa 65.
Dili gihapon tugutan ang mag duwa sa internet shops tungod ang gitugot lang mao ang dunay mga trabaho og mga tinun-an nga dunay requirements nga tumanon sa internet cafes.
Gi-mando usab ang 50 poesyento nga kapasidad sa makasulod ug kinahanglan nga mag obserbar sa tanan nga mga health ug safety protocols ang anaa sa sulod.
Sanglit gipatuman gihapon ang curfew sa lungsod, kutob ra alas 10:00 sa gabii ang maong mga shops.
Si Cebu Governor Gwendolyn Garcia una nang namahayag nga angayan na nga hiusahon ang oras sa curfew sa lalawigan sa Sugbo subay sa tinguha nga pagbukas na sa turismo alang sa mga turista sa ubang probinsya.
Kining tanan gibuhat aron hinayhinay nga makabangon ang ekonomiya sa lalawigan Sugbo taliwala sa pandemiya sa Covid-19. (ANV)