Ex-convict sa kaso gihapon sa illegal nga drugas nadakpan pag balik atol sa gilusad nga buy-bust sa City Intelligence Unit sa Cebu City Police Office (CCPO) alas 11:45, Miyerkules sa gabii, Marso 3, 2021 sa Panagdait, Barangay Kasambagan, Siyudad sa Sugbo.
Ang suspek giila nga si Michael Inso Villaver, 21, nagpuyo sa H. Cortes street, Dakbayan sa Mandaue.
Nakuha gikan ni Villaver ang 28 gramos sa gituohang shabu nga mobalor og P183,600.
Siya nalakip sa data base sa CCPO isip high value individual.
Matod ni Police Lieutenant Colonel Randy Caballes, hepe sa CIU, duha ka mga semana nila nga gipaubos sa surveillance si Michael human makadawat og report labot sa iyang illegal nga negosyo.
Una siya nga nadakpan niadtong 2018 sa kaso gihapon sa illegal nga drugas ug nakagawas sa bilanggoan pag 2019.
Apan niadto lang Enero 2021 mibalik siya sa pagpamaligya sa illegal nga drugas. (AYB)