GIPANGUNAYAN og dakop sa hepe sa Daanbantayan Police Station ang usa ka lalakeng ilang nadakpan sa suway nga pagpalusot sa mga lumber human kini nisuborno kaniya og P5,000 bugti sa pagpalingkawas kaniya.
Si Michael Pacheco Cadajas, 38, minyo, taga sityo Liog-Liog, Barangay Carnaza, gidakop ni Police Major Ian Macatangay human nitunol kaniya og P5,000.
Si Cadajas ilang nasikop sa Miyerkules sa alas 11:30 sa gabii, Marso 3, 2021 sa Sitio Pangpang, Brgy. Tapilon, Lungsod sa Daanbantayan.
Si Macatangay nga nahinabi sa Superbalita Cebu nagkanayon nga nakadawat sila og report gikan sa concerned citizen nga upat ka mga tawo nga nagdiskarga og mga Lauan lumber. Ilegal ang pagpamutol og Lauan.
Wa sila maglangay, ilang gisuhid ug ilang naabtan ang upat ka mga tawo. Apan ang tulo nagdalig sakay sa dakong pumboat dala ang daghang kahoy sa pagsibat.
Nabiyaan si Cadajas ug ilang napusasan dayon gidala sa police Station.
Apan samtang didto na sa police station, nihatag kinig P5,000 kang Macatangay bugti sa pag-release kaniya ingon man sa mga kahoy.
Sa pagdunol niya sa kwarta, gipusasan siya ni Macatangay.
Ang mga kahoy gikatahong gikan sa Samar ug gipalusot dinhi sa Sugbu. Ang kahoy mobalor og P25,600.
Duha ka mga kaso ang atubangon ni Cadajas nga mao ang illegal logging ug pagpanuborno.
Ang pagputol sa Lauan kun Philippine Mahogany gidili ubos sa Executive Orer 23 ni kanhi Presidente Benigno Aquino III nga giluwatan niadtong Pebrero 2011.