USA ka dakong restaurant sulod sa dakong mall sa uptown sa siyudad sa Sugbo ang gisuwayan sa pag-ilad pinaagi sa usa ka tawag sa telepono nga magpa-cater og pagkaon.
Gigamit pa ang ngalan ni Police Colonel Josefino Ligan, direktor sa Cebu City Police Offiec (CCPO) sa pag-order og mga pagkaon alang sa 200 ka mga tawo.
Sumala sa tawag, ang venue sa kaon mao ang CCPO.
Apan natingala ang management sa catering services human nga ang nagpaila nga si Ligan human nangayo kini og load sa cellular phone nga mobalor og P500.
Nibutyag pa kini nga makigkita sa usa ka dapit sa dakbayan aron bayran ang order.
Naghatag pa usab kini og pangalan nga barangay kapitan sa usa sa mga barangay sa habagatang bahin sa siyudad sa Sugbo sa pagmatuod nga wala siya mangilad.
Adunay gihatag nga numero kini sa cellphone sa management sa restaurant apan dihang gitawagan, dili na kini makontak nga gituohan nga gilabay na kini sa suspek.
Gi-double check kon tinuod nga ang hepe sa CCPO maoy nag-order og pakaon ug nasuta nga ilad ang tawag nga nadawat sa restaurant.
Tungod niini, ang CCPO miduso sa maong kaso ngadto sa Regional Anti-Cyber Crime Unit 7 aron pagsubay kung kinsa ang maong mangingilad uban sa pag-abag sa telephone company.
Dunay susamang modus diin gidala usab ang ngalan sa bise mayor siyudad sa Sugbo nga ni-order kinig pagkaon, apan giingong siya sa layo, nagpa-load kini og P5,000 sa mobile phone.
Matod ni Police Lieutenant Colonel Wilbert Parilla, deputy city director for operation sa CCPO, posibling lokal nga mangingilad ang naghimo niini nga modus.
Niawhag kini sa publiko kung adunay manawag kanila ug magpaila nga usa ka prominenteng tawo nga dili dayon motuo.
Dugang ni Parilla, babing maayo nga susihon una kini sa dili pa mohatag og load aron dili mabiktima sama sa gihimo sa tagdumala sa inilang restaurant. (AYB)