SUPERBALITA CEBU

Pagbakuna sa healthcare workers sa Cebu gisugdan

GIBAKUNAHAN: Aron mapakita ngadto sa publiko nga luwas ang bakuna nga CoronaVac sa Sinovac sa China, nagpabakuna si Inter-Agency Task Force (IATF) Visayas Chief Implementer retired Major General Melquiades Feliciano. / AMPER CAMPAÑA

GIHALAD sa tigpamaba sa Department of Health (DOH) 7 Dr. Mary Jean Loreche ang iyahang pagbulontaryo nga unang mabakunahan sa Covid-19 vaccine sa mga mipanaw nga healthcare workers nga lakip nila nga miatubang sa pakigbatok sa hulga sa virus.

Si Loreche mao ang usa sa nabakunahan atol sa Covid-19 Ceremonial Vaccination nga gipahigayon sa Dakbayan sa Sugbo kagahapon, Marso 4, 2021 sa Vicente Sotto Memorial Medical Center (VSMMC).

“I would always remember our fallen colleagues as they fought Covid with us,” si Loreche nagkanayon.

Unang nakadawat sa CoronaVac sa Sinovac ang medical chief sa VSMMC nga si Dr. Gerardo Aquino.

Mismo si DOH Undersecretary Dr. Gerardo Bayugo, ang pangu sa Field Implementation and Coordination Team ang nag-inject kang Aquino.

Nisunod usab sila si Loreche; Dr. Juanito Tiu, medical chief sa St. Anthony Mother and Child Hospital; Dr. Pythagoras Zerna, medical chief sa Eversley Childs Sanitarium and General Hospital, ug si Major General Melquiades Feliciano, pangu sa Inter-Agency Task Force for Covid-19 sa Visayas.

Ang mahinungdanon nga kalihokan gitambungan kini ni Presidential Spokesperson Secretary Harry Roque.

Wa mahinayon og abot si Health Secretary Dr. Francisco Duque III kay nangandam sa pagsugat sa miabot kagabii nga laing brand sa bakuna nga AstraZeneca.

Matod ni Roque nga moabot sa 487,200 ka doses sa maong bakuna ang naabot sa nasod sakay ang commercial flight.

MAGPABAKUNA

Si Aquino sa iyang bahin nibutyag usab nga niabot na sa 1,245 ka mga healthcare workers sa VSMMC ang mipadayag sa ilahang gusto nga magpabakuna gikan sa sumatotal 2,987 ka healthcare workers sa tambalanan.

Dugang ni Aquino nga aduna sila’y Quick Substitution List diin mao kini ang lista sa ubang healthcare workers nga gusto na nga magpabakuna apan di nila empleyado.

Lakip niini ang healthcare workers sa St. Anthony Mother and Child Hospital, Eversley Childs Sanitarium and General Hospital, Cebu South Medical Center, ug mga healthcare workers sa DOH 7.

Anaa sa 50-70 ka healthcare workers ang gibakuhanan kagahapon atol sa ceremonial rites samtang 400-500 ka mga healthcare workers ang target nila matag adlaw nga mabakunahan sa mosunod nga mga adlaw. Si Roque misaysay na nga unahon og hatag ang CoronaVac sa mga healthcare workers diin mauna niini ang anaa magtrabaho sa Covid-19 referral hospitals.

Sundon kadtong anaa sa pribado nga hospitals ug uban nga healthcare workers, lakip na ang barangay health workers.

Sa pagkakaron wala pa’y petsa kon kanus-a mahatagan sa bakuna nga AstraZeneca ang Sugbo.

Apan base sa taho sa Office of the Presidential Assistant for the Visayas, aduna’y dugang 9,640 ka Sinovac vaccines ang maabot karong adlawa.

Mapasalamaton usab si DOH 7 Regional Director Dr. Jaime Bernadas kang OPAV Secretary Michael Lloyd Dino tungod sa padayon nga suporta nga gihatag niini sa ahensiya sa padayon nga pakigbatok sa ahensiya sa pandemya. /

Lakip nga misaksi sa maong ceremonial rites sila si Cebu City Vice Mayor Michael Rama, Mandaue City Mayor Jonas Cortes, Lapu-Lapu City Mayor Junard Chan, ug si Chinese Consulate-General sa Cebu Jia Li. (HBL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph